Nën akuzë për kultivim kanabisi me Durim Bamin, Apeli i GJKKO lë në burg ish-efektivin e RENEA-s, Altin Morina

TIRANË- Gjykata e Apelit të Posaçëm ka lënë në fuqi vendimin e shkallës së parë duke lënë në burg Altin Morinën i dyshuar për pjesëmarrje në kultivim droge në kuadër të grupit kriminal. Prokurori Alfred Shehu relatoi para gjykatës 26 faqe përgjimë që sipas SPAK janë marrë nga aplikacioni Sky. 

Sipas SPAK, Altin Morina ka bashkëpunuar me Durim Bamin dhe një person tjetër të referuar si “Drejtori”, i cili ende nuk është identifikuar nga hetuesit. Megjithatë, avokati i Morinës ka kundërshtuar akuzat, duke pretenduar se ai nuk ka lidhje me aktivitetin kriminal të përmendur në dosje.

Ish-efektivi i RENEA-së, Altin Morina i cili ishte shpallur në kërkim në kuadër të operacionit “Revanshi” është arrestuar më 3 prill. Morina u vu në pranga nga shërbimet e komisariatit nr.2 në Tiranë teksa bashkë me të ishte edhe një person tjetër. Sipas dosjes Revanshi, Altin Morina ka bashkëpunuar me Durim Bamin për kultivimin e kanabisit në zonën e Niklës dhe Tapizës në vitet 2019-2020.