Ekziston mundësia e një takimi me Presidentin e Shteteve të Bashkuara të Amerikës, Donald Trump, në Kinë, tha sot President...
AKTUALITET
Nga Balluku tek Klosi/ Tenderi 1.1 miliardësh i Fierit, anulimi që mban erë pazari politik –
PiranjatPërditësimi i fundit 15 Shtator 2025, 13:30
Që prej momentit kur Ujësjellësi i Fierit kaloi në varësi të zëvendëskryeministres Belinda Balluku, shoqëria ka parë vetëm humbje. Në krye u vendos Mario Bakalli, i sjellë nga Balluku për nevoja elektorale. Bakalli, i njohur si “ushtar” i betejave politike të saj në Dibër, mbajti postin deri pas zgjedhjeve, kur dha dorëheqjen. Por, para se të largohej, kishte përgatitur dokumentet për një super tender prej 1.1 miliard lekësh për rrjetin e ujësjellësit në zonën DMA 10 të Fierit.
Pas tij, në krye të Ujësjellësit u emërua Klodjan Mema, i vendosur me ndikimin e deputetit socialist Ceno Klosi. Më 19 gusht 2025 tenderi u shpall, me datë mbajtjeje 9 shtator. Por një ditë më parë, më 8 shtator, Mema nxori urdhër për anulimin e procedurës, duke justifikuar “gabime dhe mangësi në dokumente”.
Kjo shpjegim klishe ka ndezur dyshimet për një manipulim klasik: tenderi u shpall, por u bllokua për pazare të brendshme. Ndërkohë, banorët e disa lagjeve të Fierit do të vazhdojnë të dëgjojnë njoftime të tipit: “Do të ketë reduktim në furnizimin me ujë”.
Por kush është drejtori që anulon një tender miliardësh me justifikimin “gabime”? Klodjan Mema nuk është emër i panjohur. Ai është përmendur edhe në Kuvend, i akuzuar për intriga dhe presione në Drejtorinë e Tatimeve, ku sipas ish-zyrtares Shilda Hasanaj, është përdorur për “sulme” ndaj administratës që nuk zbatonte urdhrat e paligjshëm të Ceno Klosit.
Pra, një drejtor i akuzuar për intriga në Tatime sot mban në dorë fatin e ujit të qytetarëve të Fierit. Në vend që të zgjidhë problemin e furnizimit me ujë, duket se ka zgjedhur të përsërisë skenarin e vjetër: shërbim për shefat, dhe “intriga” mbi kurrizin e qytetarëve.
