Nga urdhëri i mbrojtes së gruas te thyerja e arrestit shtëpiak në Itali, Policia jep detaje shtesë për Aleks Markun

Aleks Marku

DURRËS - Policia ka dalë me një tjetër reagim në lidhje me ngjarjen që u raportua këtë të mërkurë në Durrës, ku 40-vjeçari Aleks Marku mbante peng fëmijët e tij të mitur dhe qëllonte me armë zjarri në banesë.

Në informacionin shtesë, blutë bëjnë me dije se partnerja e Markut, në datat 14 dhjetor 2023 dhe 27 mars 2024 ka kërkuar lëshim të menjëhershëm të urdhrit të mbrojtes, për shkak të përplasjeve që kishin në çift. Por sipas policisë bashkëshortja 32-vjeçarja me iniciale B. M., nuk është paraqitur në Gjykatë në asnjërën nga seancat.

Më tej policia njofton se pas verifikimeve ka rezultuar se Aleks Marku ka thyer masën e sigurisë “Arrest në shtëpi” në Itali, të caktuar për veprën penale “Vjedhja”. Lidhur me ngjarjen që u raportuar sot, Marku dyshohet se ka qënë në efektin e lëndëve narkotike, ndërsa më herë ai deklaroi se qëlloi me armë pasi mendonte se dikush po e sulmonte. 40-vjeçari kishte vetëm pak kohë që ishte zhvendour bashkë me fëmijët në një banesë të marrë me qira te "Shkëmbi i Kavajës, ndërsa familjarët kanë ngritur akuza se Marku ushtron dhunë ndaj fëmijëve të tij, dhe sipas tyre për këtë kanë denoncuar edhe në polici.

Njoftimi i plotë i policisë:

Në lidhje me ngjarjen e ndodhur rreth orës 02:30, të datës 15.05.2024, në zonën e quajtur “Shkëmbi i Kavajës”, ku shtetasi A. M., 40 vjeç, banues në Lezhë, u neutralizua nga shërbimet “RENEA”, në bashkëpunim me ato të Policisë së Durrësit, pasi mbajti peng 2 fëmijët e tij të mitur (6 dhe 11 vjeç), në një apartament të marrë me qira, dhe qëlloi nga dritarja me armë zjarri kallashnikov, ju infomojmë se:

Pas shoqërimit të tij në ambientet e Policisë, u kryen veprimet procedurale dhe në përfundim të tyre u bë arrestimi në flagrancë i 40-vjeçarit, për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Heqja e paligjshme e lirisë”, “Shkatërrimi i pronës”, “Prishja e qetësisë publike” dhe “Kundërshtimi i punonjësit të policisë së rendit publik”.

Në vijim, lidhur me rrethanat e kësaj ngjarjeje, ju informojmë se shërbimet e Komisariatit të Policisë Lezhë, më datat 14.12.2023 dhe 27.03.2024, kanë referuar në Prokurori, kërkesat për lëshimin e menjëhershëm të urdhrit të mbrojtjes për bashkëshorten e shtetasit A. M., shtetasen B. M., 32 vjeçe. Në asnjërën nga seancat, 32-vjeçarja nuk është paraqitur në Gjykatë.

Gjithashtu, përsa i përket gjendjes penale të shtetasit A. M., ju informojmë se pas verifikimeve ka rezultuar se në Itali, ka thyer masën e sigurisë “Arrest në shtëpi”, të caktuar për veprën penale “Vjedhja”.

Në drejtimin e Prokurorisë së Durrësit, grupi hetimor vijon hetimet dhe veprimet procedurale, për të përcaktuar nëse 40-vjeçari ka qenë në efektin e lëndëve psikotrope, gjatë ngjarjes, si dhe për të dokumentuar me prova të ligjshme, rrethanat e tjera të këtij rasti.

durres arrestim policia aleks marku

aleks marku durres arrestim policia