Autoritetet në Afrikën e Jugut vijojnë hetimet për vdekjen e papritur të futbollistit Jayden Adams, mesfushorit të Mamelodi Sund...
AKTUALITET
"Një nga anëtarët e grupit dyshohet se ka ikur drejt Dubait", Lala: Lidhja e Bujar Shegës me Suel Çelën, konsiderohej si truri financiar i organizatës
r.llPërditësimi i fundit 25 Nëntor 2024, 21:44
klodiana lala
TIRANË- Gazetarja Klodiana Lala ka folur mbrëmjen e sotme për operacionin më të fundit të SPAK ku janë lëshuar 21 urdhër-arreste, ku përfshihen edhe disa ish-funksionarë të sistemit të drejtësisë. Lala tha se është një hetim që e ka bazën te zbërthimi i SKY ECC dhe më pas tek të dhënat që kanë ardhur nga autoritetet belge. E ftuar në emisionin "Open" në News24, ajo tha se janë shpallur në kërkim disa nga anëtarët e grupit të Suel Çelës, ku dyshohet se një prej tyre është larguar drejt Dubait
“Është shpallur në kërkim me një masë të re sigurie Suel Çela, i cili nuk është arrestuar. Mëngjesin e sotëm është kryer kontroll në bazat e tij dhe në tregun ushqimor. Janë shpallur në kërkim edhe disa anëtarë të grupit të tij, njëri dyshohet se është larguar para pak ditësh drejt Dubait. Një tjetër emër është Marsel alias Bujar Shega, është arrestuar në Milano dhe më pas do të bëhet procedura për ekstradimin. Konsiderohet si truri financiar i organizatës. Shumë nga emrat nuk janë arrestuar, po bashkëpunohet me autoritetet belge, spanjolle, madje edhe me autoritetet në Emiratet e Bashkuara Arabe”, tha Lala.
Ajo tha se Suel Çela është në kërkim prej 4 vitesh, janë bërë disa aksione për t’a arrestuar, por nuk është bërë e mundur.
“Bujar Shega ka një lidhje krushqie me ish-deputetin e PDIU-së, Aqif Rakipi. Ai është i përfshirë jo vetëm në çështjen e trafikut të drogës, por edhe pastrimit të parave. Ai ka dy kompani, ndërsa ka qenë ish-ortak me Zihni Demon, babain e Kryebashkiakut të Beratit”, tha Lala. Ajo tha se në këtë organizatë dyshohet të jenë edhe ish-funksionarë të drejtësisë dhe policisë.
“Kemi Dedan Gjonin një ish-funksionar, për të cilin ka 2 masa sigurie, dhe bashkë me këtë të sotme i bëhen 3 masa sigurie. Ish-gjyqtarja Pajtime Fetahu është arrestuar, ishte në arrest shtëpie në kuadër të një tjetër operacioni”, tha Lala.
Gazetarja tha se ka shumë vepra penale që akuzohet kjo organizatë duke nisur që nga trafiku i drogës, pastrimi i parave, korrupsioni.
Lidhur me masat “detyrim paraqitje” për dy gazetarët, Artan Hoxha dhe Elton Qyno, gazetarja Lala tha se një goditje në mesin e gazetarëve është një goditje ndaj të gjithë ne. “SPAK deri në momentin që ne flasim nuk na ka bërë me dije se cilat janë të dhënat, dyshimet e arsyeshme, që ka ndaj dy kolegëve. SPAK duhet të dëshmojë se cila është lidhja konkrete e gazetarëve me këtë organizatë”, tha Lala.
