Operacioni "Ura"/ Gjykata e Tiranës miraton nisjen e procedurave për ekstradimin në Itali të Ekil Nderjakut dhe Ervis Detit

ekil nderjaku

TIRANË- Gjykata e Tiranës ka miratuar kërkesën e palës italiane për nisjen e procedurave të ekstradimit për Ekil Nderjakun dhe Ervis Detin. Ndaj tyre u lëshua urdhërarrest në kuadër të operacionit ndërkombëtar antidrogë "Ura". 

Gjykata e Tiranës caktoi për Nderjakun dhe Detin masën e sigurisë "arrest në burg", deri në mbërritjen e dokumentacionit nga Italia. Po ashtu shpalli kalim e akteve në Gjykatën e Durrësit, e cila do të vendosë mbi ekstradimin, e tyre pasi dy të arrestuarit janë banorë të këtij qyteti. 

Ekil Nderjakut i njohur dhe si Genti Nderjaku, iu komunikua masa e sigurisë "arrest me burg" në kuadër të operacionit "Ura", në qeli.  Nderjaku është një prej 6 të akuzuarve për atentatin ndaj ish-prokurorit Arjan Ndoja, në bashkëpunim me persona të tjerë ende të paidentifikuar gjatë harkut kohor 04.09.2020 – 30.01.2021. Nderjaku akuzohet se ka siguruar kushtet dhe mjetet materiale për të eliminuar Mitri Priftin në periudhën 4 tetor 2020 deri në 30 janar 2021.

Ndërkohë i arrestuari tjetër Ervis Deti u vu në pranga gjatë zhvillimit të operacionit “Ura”, pas urdhërarrestit të lëshuar nga Gjykata e Barit në Itali. Për të tjerët, që kanë masë sigurie në mungesë nga Gjykata e Posaçme, pritet të dalin të premten për verifikim të masës dhe marrje në pyetje.