Çmimet e larta të karburanteve po rëndojnë mbi buxhetet familjare dhe po ndryshojnë zakonet e përdorimit të automjeteve. ...
AKTUALITET
Partia e Lirisë: Arsimimi në Shqipëri në kushte të mjerueshme
PiranjatPërditësimi i fundit 22 Nëntor 2025, 11:59
Sot në ditën e alfabetit të gjuhës shqipe, Zv. Sekretares së Përgjithshme, Znj. Brunilda Haxhiu e Partisë së Lirisë deklaroi se arsimi në Shqipëri ndodhet në gjendje të mjerueshme.
Sipas Haxhiut në shumë shkolla mungojnë kushtet për një arsimim cilësor, si laboratorët, mësuesit, ngrohje gjatë dimrit dhe transporti.
“Shkollat janë amortizuar dhe rrezikojnë jetën e nxënësve. Kërkimi shkencor financohet me 0.06 përqind të prodhimit të brendshëm bruto. Në ditën e alfabetit duhet të flasim për shkollat që janë pa ngrohje, 35 mijë nxënës ecin disa kilometra në ditë për të arritur në shkollë. Një vend që pretendon të jetë anëtar i BE-sw. 60 përqind e maturantëve duan të largohen nga Shqipëria sepse nuk e shikojnë të ardhmen e tyre në Shqipëri. Ky buxhet nuk i ndihmon aspak nxënësit. Duhet investim për laboratorët në shkolla. Arsimi ka nevojë për rikonceptim të plotë”, deklaroi Haxhiu.
Deklarata plotë
"Sot, në Ditën e Alfabetit, sistemi ynë arsimor është më larg se kurrë nga misioni i tij i vërtetë: të japë dije , të emancipojë dhe të hapë horizonte për brezat e rinj. Buxheti i arsimit për vitin 2026 paraqitet me objektiva ambicioze, por kur prek shifrat, zbulon propaganden. Investimet kapitale janë vetëm 0.2–0.3% e PBB, më të ulëtat në rajon. Në një vend ku 40% e shkollave janë ndërtuar para viteve ’90, ku shkollat jane amortizuar dhe rrezikojnë jetën e fëmijëve, ky nivel financimi është thjesht i pamjaftueshëm.
Dita e Alfabetit është dita e dijes, por kërkimi shkencor në Shqipëri financohet me 0.06% të PBB-së, më pak se çdo vend tjetër në Ballkan. Ndërsa Europa investon 2.2% për shkencën, qeveria jonë investon aq pak, saqë universitetet tona mbijetojnë vetëm falë projekteve të huaja.
Në Ditën e Alfabetit duhet të flasim edhe për fëmijët që mësojnë në shkolla pa ngrohje, në klasa të mbingarkuara, pa laboratorë, pa pajisje, pa bibliotekë funksionale. Duhet të flasim për 35 mijë nxënës që ecin kilometra çdo ditë, sepse transporti arsimor i premtuar nuk ofrohet.
Duhet të flasim për faktin se një psikolog mbulon deri në 1,500 nxënës dhe se qindra shkolla funksionojnë me dy turne – një praktikë e vendeve të pazhvilluara, jo e një vendi që pretendon të jetë pjesë e Europës.
Dhe, mbi të gjitha, sot duhet të flasim për një tragjedi kombëtare: 63% e maturantëve duan të largohen nga Shqipëria sepse nuk shohin asnje prespektive per te ardhmen.
Në këtë ditë të shenjtë të kombit, kur përkujtojmë intelektualet shqiptare që ngritën arsim, kulturë dhe identitet kombetar, qeveria sjell një buxhet që i bie ndesh çdo parimi të Rilindjes sonë të vërtetë kombëtare.
Dita e Alfabetit duhet të jetë ditë reflektimi kombëtar. Thirrja jonë sot është e qartë:
Shqipëria ka nevojë për një rilindje të arsimit duke e buxhetuar atë . Duke ringritur figuren e mesuesit si autoritet i edukimit per dijen dhe model i shoqerise.
Duhet investim për laboratorë, për kërkim shkencor, për siguri ne shkolla, për dinjitet te mesuesit dhe nxenesit dhe mundesi reale per punesim per të rinjtë e këtij vendi. Arsimi ka nevojë për një rikonceptim të plotë, për një financim të vërtetë dhe për politika që adresojnë realisht sfidat e sotme; vetëm kështu Shqipëria mund të ndërtojë një sistem arsimor dinjitoz, modern dhe të drejtë, që u jep fëmijëve tanë mundësi të barabarta, të rinjve perspektivë dhe vendit një të ardhme."
