Presidenti i Federatës Palestineze të Futbollit, Jibril Rajoub, ka deklaruar se nuk ka marrë vizë për të hyrë në Shtet...
AKTUALITET
Pas 100 vitesh mungesë/ Flamingot rikthehen në Florida dhe bëhen simbol i shtetit
PiranjatPërditësimi i fundit 13 Qershor 2026, 10:03
Një shekull më parë, flamingot amerikane u gjuajtën pothuajse deri në zhdukje në Florida gjatë periudhës së tregtisë së pendëve. Zhdukja e tyre ishte aq e plotë, sa flamingoja rozë prej plastike, e vendosur në oborre dhe kopshte, u bë simboli i një zogu që shumica e banorëve të Floridës nuk do ta shihnin kurrë në natyrë.
Më pas erdhi një kthesë e papritur.
Në gusht të vitit 2023, uragani Idalia devijoi një tufë prej 300 deri në 400 flamingosh nga rruga e tyre e zakonshme migratore mes Gadishullit Jukatan dhe Kubës, duke i shpërndarë në të gjithë Floridën, madje deri në shtetin e Wisconsin-it.
Ndërsa shumë prej tyre vazhduan udhëtimin, disa mbetën aty.
Gjatë dimrit 2025–2026, flamingot nisën të raportoheshin rregullisht në dy zona të njohura të Floridës: Florida Bay pranë Snake Bight dhe Rezervatin Kombëtar të Jetës së Egër Merritt Island pranë Kanalit Haulover. Fotografët dokumentuan grupe me deri në 50 flamingo në Florida Bay, ndërsa në Merritt Island u vëzhguan vazhdimisht një duzinë ose më shumë zogj.
Rikthimi i tyre ka tërhequr vëmendjen e publikut. Më 11 shkurt 2026, Dhoma e Përfaqësuesve e Floridës votoi me rezultatin 112 pro dhe 1 kundër për ta shpallur flamingon amerikane zogun zyrtar të shtetit, duke njohur rikthimin e jashtëzakonshëm të kësaj specieje pas më shumë se një shekulli mungese. Megjithatë, masa ende pret miratimin nga Senati dhe firmën e Guvernatorit.
Pavarësisht këtij suksesi, rikuperimi i popullatës mbetet i brishtë. Ende nuk është konfirmuar asnjë rast folezimi në gadishullin e Floridës dhe shkencëtarët vazhdojnë të monitorojnë nga afër numrin e tyre. Flamingot përballen me kërcënime të vazhdueshme si ndryshimet klimatike, zhvillimi i zonave ligatinore dhe speciet pushtuese. Për shkak se shumohen ngadalë, një rikuperim i plotë afatgjatë mund të kërkojë dekada dhe jo vetëm disa vite.
Studiuesit theksojnë se rikthimi i flamingove nuk lidhet vetëm me uraganin. Historia më e rëndësishme është restaurimi i ekosistemit të Everglades. Dekada të tëra pune për ruajtjen e mjedisit kanë ndihmuar në stabilizimin e Florida Bay, rikthimin e habitateve me barishte detare dhe përmirësimin e kushteve natyrore që flamingot kanë nevojë për të mbijetuar.
Për gati 100 vjet, Florida kishte vetëm flamingo prej plastike. Sot, flamingot e vërteta janë rikthyer dhe shteti po shkon drejt njohjes së tyre si zogu zyrtar i Floridës. A mos janë vallë këto flamingot që po largohen nga Shqipëria?/Përktheu Piranjat News, marrë nga National Geographic
