Pasuri me vlerë 77 milionë lekë janë vendosur nën sekuestro preventive në kuadër të hetimit të SPAK për traf...
AKTUALITET
Pas satelitëve dhe fotografimit ajror, qeveria hap tender 500 mijë euro për pyllëzime me dron!
PiranjatPërditësimi i fundit 22 Qershor 2026, 22:42
Vendi ynë është bërë qesharak në raport me vendet e rajonit apo ato të Bashkimit Europian, pasi nismat për kontrollin e territorit me satelitë apo fotografi nga hapësira, veçse kanë rënduar arkën e shtetit. Fillimisht u hap tenderi me vlerë mbi 7 milionë euro për të ngritur dy satelitë, të cilët do të monitoronin pyjet, zjarret, ndërtimet pa leje apo edhe do të kontrollonin zaptimin e hapësirave në plazhe.
Një propagandë boshe, pasi prodhoi vetëm disa kronika dhe fjalime të krerëve të shtetit, të cilat nuk janë aspak të dobishme për mbrojtjen e jetës apo të pronës të njerëzve të thjeshtë. Dhe, për të “korrigjuar” këtë tender, ndërhyri më vonë Fondi Shqiptar i Zhvillimit, që shpenzoi gati 3 milionë euro, duke kontraktuar një firmë turke për të fotografuar Shqipërinë nga ajri.
Deri më sot s’kemi parë sesa efikase kanë qenë këto tendera në Shqipëri, sa i kanë ndihmuar autoritetet shtetërore, apo sa i kanë ardhur në ndihmë edhe njerëzve të thjeshtë, të cilët në këto kohëra kanë parë vetëm projekte të shumta të zaptimit të hapësirave të mëdha nga qeveria.
Dhe kur menduam se këto marrëzi kishin marrë fund, ja ku vjen një tjetër projekt tepër i dyshimtë i institucioneve shtetërore. Agjencia Kombëtare e Zonave të Mbrojtura ka hapur një tender me objekt “pyllëzime në shkallë të gjerë nëpërmjet mbjelljes precize me dronë”.
Një nismë e padëgjuar jo vetëm në Shqipëri, por edhe në vendet më të përparuara, teksa gjatë këtyre kohëve kemi parë jo mbjellje të pemëve, por masakrimin e pyjeve, e për rrjedhojë rrëshqitje masive. Sëpata s’ka kursyer as zona të mbrojtura, pasi me apo pa leje, pyjet në Shqipëri po rrafshohen dita – ditës.
Moratoriumet e famshme kanë sjellë kontroll të shtetarëve të sëpatës, pasi bashkitë dhe zonat e mbrojtura bëjnë tendera për pastrime pyjesh, kur në fakt vetëm pastrime s’bëhen, por prerje masive. Tashmë vjen projekti i famshëm i mbjelljes me dronë, ku në javët apo muajt në vijim do të shohim spektakle të ministrave apo të vetë kryeministrit që do të shpërndajë pamje sesi fidanët do të shpërndahen në sipërfaqe djerra.
Sipas dokumenteve që disponon Vox News, Agjencia Kombëtare e Zonave të Mbrojtura do të shpenzojë 500 milionë lekë të vjetra për këtë nismë, e cila nuk dihet sesa efikase do të jetë. Nëse do të ketë të njëjtin fat si satelitët apo fotografitë, koha do të tregojë nëse bëhet fjalë për propagandë apo për punë konkrete. /Vox/
