Gazetari dhe kreu i PD-së në Krujë, Aulon Kalaja, denoncoi në emisionin “Kafe Shqeto” në SYRI TV vështirësit&eu...
AKTUALITET
Pasuria me ofertë speciale/ Gruaja e zyrtarit të ‘Bankers’ ble resortin në Vlorë për çmimin e një telefoni!
PiranjatPërditësimi i fundit 17 Shtator 2025, 12:27
Sipërmarrësja Ela Puka, bashkëshortja e ish-drejtorit të kompanisë publike të naftës, “Albpetrol” sha, Endri Puka, ka bërë një goditje sa spektakolare, aq edhe të mistershme financiare.
Pak ditë më parë, ajo ka blerë për vetëm 500 euro (51 mijë lekë) 51 përqind të aksioneve të shoqërisë “A.T. Oricum”, me emrin tregtar “Azar Luxury Hotel”. Kompania, e cila deri më tani, ishte në pronësi të inxhinierit me origjinë greke, Kostantinos Muola, rezulton që të jetë kontrolluese e një kompleksi të madh dhe shumë luksoz, pranë Ujit të Ftohtë në Vlorë, pranë Lungomares.
Pronari i mëparshëm, Muola ka vendosur të shesë të gjithë aksionet e tij. Krahas Ela Pukës, e cila ka marrë 51 përqind të aksioneve, ortak i ri në shoqërinë “A.T Oricum” është edhe Eraldo Sheko, i cili ka mbajtur për disa kohë edhe pozicionin e administratorit në shoqëri. Ky i fundit i ka blerë aksionet për një shumë prej 49 mijë lekë të reja (më pak se 500 euro).
Transaksioni mes palëve duket në vlera minimale, referuar aseteve të kompanisë. Megjithatë, shkaqet e kësaj shitjeje nuk janë specifikuar në kontratën e shit-blerjes, së konsultuar nga “Boldnews.al”.
Bizneset e çiftit Puka
Ela Puka rezulton aksionere në disa kompani të ndryshme, me aktivitete konsulence apo investimesh në fushën e ndërtimeve dhe hidrokarbureve.
Ajo dhe bashkëshorti i saj, Endri Puka, zotërojnë gjithashtu një shoqëri marketingu. Ndërkohë, edhe Endri rezulton aksionerë në disa subjekte private, mes të cilave “Aksent L&BC”, një studio konsulence për zhvillimin e bizneseve.
Të dhënat e publikuara më herët në media tregojnë se zyra e konsulencës së Endri Pukës ka përfituar, më së paku 1.4 milionë euro nga kompania private e naftës, “Bankers Petroleum”.
Ky raport financiar mes “Bankers” dhe zyrës së konsulencës së Endri Pukës është shoqëruar me dyshime publike për një skemë pastrimi parash dhe korrupsioni. Këto dyshime mbështeten në faktin që Endri Puka, për disa vite ka qenë drejtor i përgjithshëm i “Albpetrol”, kompania publike e naftës që kishte për detyrë kontrollin e aktivitetit të “Bankers”.
Në korrik të këtij viti, Prokuroria e Fierit arriti në konkluzionin se kompania “Bankers” dyshohet se është përfshirë në një skemë shumë të madhe pastrim parash dhe mashtrimesh financiare në dëm të shtetit. Sipas prokurorëve, aktiviteti i dyshuar kriminal është shtrirë në një kohë të gjatë, në të cilën përfshihet edhe periudha kur “Albpetrol” drejtohej nga Endri Puka.
Në kuadër të atij hetimi, u arrestuan drejtuesi ekzekutiv i Bankers, shtetasi kinez Hongping Xiao, paraardhësi i tij, Leonidha Çobo, si edhe tetë anëtarë të tjerë të stafit të shoqërisë private. Ndërkohë, Prokuroria e Fierit ka njoftuar se hetimi është ende në zhvillim dhe po verifikohen, ndër të tjera, edhe përgjegjësitë e drejtuesve ndër vite të shoqërisë publike “Albpetrol, sha”.
Endri Puka tek “Albpetrol”
Endri Puka u emërua në krye të “Albpetrol sha” në Tetor të vitit 2013, si një investim i drejtëpërdrejtë i deputetit socialist të asaj kohe, Koço Kokëdhima. Puka kishte drejtuar më herët administrativisht grupin mediatik të Kokëdhimës dhe raportet mes tyre ishin shumë të forta.
Puka qëndroi në detyrë për një periudhë gati 5-vjeçare. Ndërkohë që pozitat e tij ishin shumë të forta fillimisht, për shkak të mbështetjes nga Kokëdhima, ai e humbi fuqinë pas “mentori” i tij politik krisi raportet me kryeministrin Edi Rama.
Në vitin 2018, një raport i Kontrollit të Lartë të Shtetit (KLSH) zbuloi një seri shkeljesh të rënda në raportet mes “Albpetrolit”, të drejtuar nga Endri Puka dhe kompanisë “Bankeres Petroleum” (B.P.A).
KLSH i rekomandonte në atë kohë Pukës që të mbante në kontroll veprimtarinë e “Bankers”, pasi ishin konstatuar se kompania private zhvillonte procedura tenderuese për mallra e shërbime me çmime shumë më të larta se tregu. Sipas KLSH, kjo situatë ndikonte në uljen e fitimeve të shoqërisë dhe, rrjedhimisht, edhe në uljen e taksës që “Bankers” duhet t’i paguante shtetit.
Gjithashtu, Kontrolli i Lartë i Shtetit i rekomandonte Endri Pukës që të monitoronte zbatimin e projekteve të aplikuara nga “Bankers”, pasi ishin konstatuar devijime të rëndësishme.
Përballë këtyre gjetjeve, “Albpetrol” iu përgjigj me sulm Kontrollit të Lartë të Shtetit: “Raporti i publikuar nga KLSH është një sulm dashakeq me motive personale i urdhëruar nga kryetari i KLSH-së, Bujar Leskaj kundrejt Albpetrolsh.a. Ky nuk është rasti i parë që ky institucion vepron në këtë mënyrë në dëm tëAlbpetrolsh.a.”, thuhej në një deklaratë publike të zyrës së Endri Pukës në “Albpetrol”.
