Pjesë e grupit të Ergys Dashit që u vra në Ekuador, kush është i riu që u vetëdorëzua dje në polici, një vit më parë u arrestua në Itali, mister arsyet e lirimit

TIRANË- Rako Plaku, i njohur ndryshe edhe si Ledi është 36-vjeçari shqiptar që u vetëdorëzua në komisariatin e policisë numër 2 në Tiranë. Policia bëri me dije një ditë më parë, përmes një njoftimi zyrtar se 36-vjeçari ishte shpallur në kërkim nga autoritetet italiane pasi akuzohej për veprat penale “Organizatë kriminale” dhe “Trafikimi i narkotikëve”. Në bashkëpunim me Interpol Tirana vijojnë procedurat për ekstradimin e tij,”.

Kush është Rako (Ledi) Plaku?

Plaku ishte pjesë e grupit të Ergys Dashit, të riut nga Durrësi që u ekzekutua në Ekuador në janar të vitit 2022, teksa konsumonte një darkë në Guayaquil. Ai u vu në pranga bashkë me 15 persona të tjerë në prill të vitit 2022, në kuadër të një operacioni që u organizua në vendin fqinj. Një prej anëtarëve, Stivi Filolli, u arrestua në Tiranë.

Por, nuk dihet se në cilat kushtet është liruar Plaku dhe arsyet që e shtynë të vetëdorëzohej një ditë më parë.

Hetimet investigative të antimafias italiane u shtrinë në Shqipëri, Itali, Ekuador, Slloveni,  Polonia, Gjermani, e Zvicër. Grupi kriminal i drejtuar nga Dashi menaxhonte drogën që mbërrinte në Europë e një kapital financiar që garantonte strehimin e korrierëve të drogës si dhe makinat luksoze për transportimin e saj. 

Makinat modifikoheshin në Slloveni, ndërsa banesat merreshin me qira nga persona të tretë, e përdoreshin si për strehimin e korrierëve dhe për magazinimin e lëndës narkotike. Kokaina mbërrinte nga Amerika e Jugut përmes rrugës detare në portet europiane. Në total u sekuestrua drogë me vlerë rreth 4.5 milionë euro.

Ekzekutimi ka ndodhur 22 janar në orën 19:00, kur një nga autorët ka hyrë brenda lokalit me synimin për të ekzekutuar Ergys Dashin, ndërsa tjetri e priste jashtë me motor për ta larguar. Autori mbante një buqetë me lule në duar, për t'u ruajtur nga kamerat e sigurisë së barit, dhe teksa i është afruar me vrap tavolinës ku ndodhej Dashi ka nxjerrë armë dhe ka qëlluar për vdekje durrsakun, ndërkohë që miku në tavolinë me Dashin ka tentuar të qëllojë autorin me karrige, por është zmbrapsur pasi autori vijonte të qëllonte me armë edhe teksa largohej me vrap jashtë lokalit. Në momentin e ekzekutimit, ka pasur edhe klientë të tjerë në lokal, të cilët kanë mbetur të tmerruar nga breshëria e armës. Në vendngjarje, ekspertët e kriminalistikës kanë grumbulluar mbi 20 gëzhoja. Sipas mediave në Ekuador, dyshohet se Dashi është i përfshirë në trafikun e kokainës dhe se prishja e pazareve të drogës të jetë shkak i ekzekutimit të tij nga bandat rivale.

Njoftimi i policisë për dorëzimin e Plakut:

Më datë 24.04.2023, në Komisariatin e Policisë Nr. 2 është vetëdorëzuar shtetasi R.(L). P., 36 vjeç, banues në Yzberisht, Tiranë, i cili ishte shpallur në kërkim ndërkombëtar, pasi autoritetet gjyqësore italiane kanë lëshuar ndaj tij, urdhër arrestin për veprat penale “Organizatë kriminale” dhe “Trafikimi i narkotikëve”. Në bashkëpunim me Interpol Tirana vijojnë procedurat për ekstradimin e tij. /dosja.al

ergysdashi ekuador polici