Senatorja amerikane Elissa Slotkin (Demokrate nga Miçigani) ka reaguar në rrjetin social X lidhur me dhunën policore në protestën stu...
AKTUALITET
Referencat për hotelet, Tatimet dërgojnë formularin: Deklaroni kapacitetin dhe shfrytëzueshmërinë!
n.fPërditësimi i fundit 9 Prill 2025, 09:17
TIRANË- Të gjithë strukturat akomoduese në vend do të duhet të plotësojnë formularin ku deklarojnë kapacitetin e tyre si dhe nivelin e shfrytëzimit. Drejtoria e Përgjithshme e Tatimeve dërgoi pranë bizneseve formularin përkatës duke kërkuar që strukturat akomoduese pasi ta plotësojnë atë ta dërgojnë pranë Ministrisë së Turizmit dhe Mjedisit.
“Në zbatim Vendimin e Këshillit të Ministrave nr. 160 datë 12.03.2025” Për përcaktimin e periudhës së shfrytëzimit të nivelit minimal të kapacitetit të shfrytëzimit të strukturave akomoduese” subjektet që ushtrojnë veprimtari si strukturë akomoduese duhet të deklarojnë për vitin 2025 kapacitetin dhe nivelin e shfrytëzueshmërisë brenda 30 ditëve nga data 13 mars 2025, data e botimit të VKM në fletoren zyrtare sipas formularit të parashikuar në këtë VKM.
Deklarimi mund të dërgohet në formë shkresore në adresën e Ministrisë së Turizmit dhe Mjedisit ose në mënyrë elektronike në adresën e emailit: [email protected] sipas formularit të deklaratës bashkëlidhur. Formulari i deklaratës është bashkëngjitur këtij njoftimi dhe mund të shkarkohet për plotësim. Ju kujtojmë se plotësimi dhe dorëzimi i formularit është detyrim ligjor për të gjitha strukturat akomoduese” thuhet në njoftimin e Tatimeve.
Qeveria synon që të taksimi i hoteleve të bëhet mbi bazë të vlerave referencë llogaritur në dy periudha të ndryshme. Vendimi që specifikon detajet e kësaj praktike u miratua në datë 12 mars në mbledhjen e Këshillit të Ministrave. Pjesë e kësaj forme deklarimi do të jenë të gjithë strukturat akomoduese sipas kategorisë: “Bujtinë”; b) “Bllok apartamentesh”; c) “Motel”;ç) “Fjetje dhe mëngjes”; d) “Hotel”;dh) “Hotel i shpërndarë”; e) “Resort”;ë) “Strukture akomoduese e trashëgimisë kulturore”.
Periudha e shfrytëzimit është ndarë në dy të tilla duke parashikuar pjesën më të mirë të vitit kur është dhe piku dhe atë më më të dobët që kryesisht përfshin muajt e ftohte. Kështu përkatësisht, nga data 1 maj deri në datën 30 shtator dhe nga data 1 tetor deri në datën 30 prill të çdo viti.
Konkretisht niveli minimal i shfrytëzimit të strukturës akomoduese është: a) jo më pak se 65 % e kapacitetit të strukturës akomoduese për periudhën nga data 1 maj deri në datën 30 shtator; b) jo më pak se 30 % e kapacitetit të strukturës akomoduese për periudhën nga data 1 tetor deri në datën 30 prill.
Vendimi përcakton se sipërmarrësit mund të zgjedhin të deklarojnë këtë nivel minimal shfrytëzimi i cili në sitën e Tatimeve vlerësohet nga zyra ose të deklarojë një tjetër që e parashikojnë vetë që në rast se është më i ulët se minimali do të bëhet objekt vlerësimi nga ana e autoriteteve për të parë saktësinë duke përfshirë të dhëna alternative nga terreni.
Biznesi nuk është dakord me referencën. Pak ditë pasi qeveria njoftoi vendosjen e referencës bizneset e sektorit deklaruan se ajo nuk ishte reale dhe se sidomos gjatë muajve jashtë pikut niveli 30 për qind i shfytzueshmërisë është i paarritshëm.
Për rajone të caktuara ky nivel luhatet mes 10-15 për qind. Sipas tyre vendosja e një reference përveçse do të detyrojë strukturat të mbyllin aktivitetin gjatë periudhës jashtë sezonit do të sjellë edhe një rrezik të shtuar për humbjen e fuqisë punëtore. Kjo e fundit do të kërkojë punë me stabilitet më të lartë ndërkohë që do ta vërë nën presion biznesin e turizmit gjatë sezonit të pikut për të ofruar një shërbim cilësor./ Monitor
