Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
Rënie gurësh dhe inerte në rrugë, probleme në Kukës me qarkullimin e automjeteve
PiranjatPërditësimi i fundit 26 Tetor 2025, 14:23
Në qarkun e Kukësit, reshjet e shiut vazhdojnë me intensitet të lartë, duke sjellë një seri problematikash për qytetarët dhe infrastruktura. Si pasojë e reshjeve, janë raportuar ndërprerje të energjisë elektrike në disa lagje të qytetit dhe fshatra, duke shkaktuar vështirësi për shumë banorë.
Përveç kësaj, ka pasur probleme me qarkullimin në disa akse rrugore nacionale dhe rurale. Aksesi në rrugët Kukës–Bushtricë, Kukës–Shishtavec, Kukës–Peshkopi, Bajram Curri–Valbonë dhe Kukës–Qafë Mali është i bllokuar në disa pjesë për shkak të prezencës së gurëve dhe dherave që kanë rënë në rrugë, duke vështirësuar kalimin dhe krijuar rrezikshmëri për udhëtarët.
Një aspekt pozitiv nga reshjet ka qenë ndikimi në liqenin e Fierzës, ku prurjet janë rritur me mbi 250 metër kub ujë në sekondë, një nivel që ka ndihmuar në shtimin e rezervave ujore. Megjithatë, autoritetet lokale dhe ato të emergjencës po ndjekin nga afër situatën për të parandaluar çdo situatë emergjente dhe për të menaxhuar ndikimet e reshjeve.
Një tjetër problem janë tokat bujqësore në disa zona të qarkut, si në Nangë, Bicaj dhe Shtiqën, ku vërshimi i ujërave ka dëmtuar rendimentin e kulturave dhe ka shkaktuar vështirësi për fermerët.
Në qytetin e Kukësit, janë formuar pellgje uji në disa zona, duke shkaktuar vështirësi në lëvizjen e qytetarëve dhe në funksionimin normal të qytetit. Bllokimi i pusetave ka përkeqësuar më tej situatën, duke bërë të nevojshme ndërhyrjen e shërbimeve për pastrimin e rrugëve dhe rregullimin e kanalizimeve.
