Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
AKTUALITET
Shembje urash e bllokim rrugësh, situata në rrethin Sarandë
PiranjatPërditësimi i fundit 21 Nëntor 2025, 16:11
Deri më 22 nëntor, është parashikuar që vendi ynë të përfshihet nga moti i keq, me reshje të herëpashershme shiu, shtrëngata dhe mjegull në disa zona.
Prania e ujit në zonën pranë Galerisë së Artit në shëtitoren e Sarandës përllogaritet të ketë arritur rreth 200 m³, si pasojë e prurjeve të mëdha që kanë ardhur nga rruga mbi shëtitore. Fatmirësisht, veprat e artit nuk janë dëmtuar, pasi ekspozimi i tyre ndodhet në një nivel më të lartë. Pothuajse e gjithë shëtitorja, përgjatë së cilës ndodhen qindra biznese dhe lokale shërbimi, është përfshirë nga vërshimi i ujërave, gjë që vërehet qartë edhe nga sasia e ujit që shkarkohet drejt detit.
Strukturat hoteliere dhe baret në katet përdhese kanë raportuar dëme në garazhe, depo dhe në hapësirat teknike si kafazët e ashensorëve, për shkak të përmbytjeve të krijuara nga reshjet intensive.
Rruga Delvinë–Kardhiq ka qenë e pakalueshme për disa orë, por ndërhyrja e bëri të mundur hapjen e saj.
Në Çukë është çarë argjinatura dhe uji ka përmbytur fushat, ndërsa një mjet zjarrfikës pranë pularisë “Butrinti Farm” është rrëzuar e zhytur në ujë. Probleme me prurje dherash dhe gurësh janë shfaqur edhe në Delvinë dhe Konispol, ku brenda qytetit ka rrëshqitje masive, raporton për Klan News, gazetarja Dorina Muhaj.
Në aksin Shkallë–Konispol–Qafë Botë rruga është bërë e pakalueshme nga dherat, ndërsa lumi Pavllo ka dalë nga shtrati duke bllokuar rrugën nacionale në vendin e quajtur Vilë. Ura që lidh fshatin Shalës me zonat Markat, Ninat dhe Janjar është shembur plotësisht, duke izoluar komunitetet. Autoritetet po vijojnë punën për normalizimin e situatës.
