Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
Shkatërrohet grupi italo-shqiptar i kokainës, në pranga 14 persona, mes tyre tetë shqiptarë
e. dPërditësimi i fundit 2 Dhjetor 2024, 16:31
ITALI- Policia italiane ka çmontuar një grup italo-shqiptar të kokainës, ku në pranga kanë rënë 14 persona, gjashtë italianë dhe tetë shqiptarë. Siç raportohet hetimet kanë identifikuan dy banda të ndryshme që lëviznin midis lagjeve San Siro dhe Bonola dhe midis Baranzate dhe Bollate, në pjesën veriore të Milanos. Gjithashtu hetuesit kanë zbardhur edhe skemën dhe strategjinë e organizatës, e cila rekrutonte kryesisht shqiptarë.
Corriere della Sera shkruan se banda u garantonte ushqim dhe akomodim për 90 ditë “kuajve” (punëtorëve sezonalë të drogës, koha e qëndrimit legal në zonën e BE për shqiptarët), që furnizonin sheshin me drogë, për të anashkaluar rregullat e emigracionit. Më pas shitësit u rikthyen në Shqipëri dhe u zëvendësuan nga tregtarë të tjerë droge.
Gjithashtu tregtarët e drogës që furnizonin rrugët dhe kujdeseshin për dërgesat në shtëpi, thuajse gjithmonë shqiptarë, u pajisën me një “paketë të plotë” që përfshinte një shtëpi, makinë apo skuter, telefonat dhe një lloj praktike me stërvitje për të mësuar teknikat e shpërndarjes së drogës.
Policia italiane ndau edhe pamjet e operacionit, por edhe detaje se si u gjurmua organizata, si bëhej shpërndarja, e dokumentuar me foto dhe pamje filmike. Gjithashtu edhe vendet ku fshiheshin sasitë e lëndës narkotike, bazat e fshehjes dhe taktikat se ku futeshin dozat e kokainës, kryesisht në bidonë uji të modifikuar apo paketa cigaresh me shtresë dyfishe.
Më pas, pas 90 ditësh, “korrierët sezonalë” u kthyen në Shqipëri me fluturime direkte, për të mos kërkuar leje qëndrimi në Itali, por duke shfrytëzuar vetëm vizën tremujore si turistë të thjeshtë. Pasi kthehej grupi i parë, drejt vendit fqinj udhëtonte një tjetër grup të rinjsh për 3 muajt e radhës.
