Shkoi me "këmbët" e veta drejt policisë/ Arrestohet 24-vjeçari shqiptar në Itali, u ndalua në rrugë për të pushuar, gjenden 22 kg drogë në bagazhin e mjetit

ITALI- Autoritetet italiane kanë vënë në pranga një shtetas shqiptarë. Mësohet se shqiptari po udhëtonte në A14 drejt Bolonjës me mbi 22 kilogramë hashash në bagazhin e makinës. Ai u ndal për një pushim në zonën e shërbimit të Esino Est përgjatë A14, pa e ditur se aty ndodhej edhe një patrullë e Policisë së Autostradës Fano.

24-vjeçari i arrestuar rezulton pa precedentë penalë. Atij iu gjetën të fshehura brenda një kutie në bagazhin e makinës së tij, 217 pako hashash, me peshë 100 gramë secila. Kontrollet janë kryer në mënyrë të rastësishme, por diçka i ka vënë menjëherë në dyshim efektivët.

Djali shfaqi shenja të dukshme nervozizmi dhe jepte përgjigje konfuze për destinacionin dhe arsyen e udhëtimit. Automjeti, i regjistruar rregullisht në Itali, ishte marrë me qira, por drejtuesi kishte me vete leje drejtimi ndërkombëtar, banues në Shqipëri dhe nuk dispononte asnjë dokumentacion italian. Në atë moment oficerët vendosën të hetojnë më tej.

Pasi u hap bagazhi, u gjet kutia me drogën e mbështjellë me blloqe të mbyllura me celofan. Djalit iu gjetën më shumë se 600 euro cash dhe dy telefona celularë. Gjithçka u sekuestrua, përfshirë edhe makinën. Vlera e drogës së kapur në treg llogaritet të paktën 30-35 mijë euro. 24-vjeçari u arrestua dhe u transferua në burgun Montacuto (An), në pritje të gjykimit.