Protesta e studentëve në Universitetin “Aleksandër Moisiu” në Durrës është shfaqur edhe në ambientet e kam...
AKTUALITET
''Shqipëria bashkëpunon me Izraelin për prodhimin e armëve'' / Pirro Vengu krenohet, por BE ka kufizuar tregtinë ushtarake me Tel Avivin
PiranjatPërditësimi i fundit 12 Nëntor 2025, 14:14
Në një kohë kur disa vende të Bashkimit Europian kanë vendosur ndalime ose kufizime ndaj bashkëpunimit ushtarak me Izraelin, drejtori i përgjithshëm i Agjencisë Kombëtare të Armatimeve, Pirro Vengu, ka deklaruar me krenari se Shqipëria po zgjeron partneritetin në këtë fushë.
“Prodhimi i municioneve. Kemi një bashkëpunim europian, të huaj dhe vendas me një linjë prodhimi nga Europa Qendrore dhe me partneritet vendas. Dhe sa i përket mjeteve të blinduara, dronëve dhe sistemeve antidronë, kemi një partneritet mes një kompanie vendase dhe një kompanie izraelite. Dhe këtu do kemi mundësinë në të ardhmen për gjëra që kemi në negociim e sipër që i kemi aktualisht me dy vende europiane dhe një vend të Lindjes së Mesme, Emiratet e Bashkuara Arabe”, deklaroi Vengu.
Deklarata e tij vjen në kontrast të plotë me qëndrimin e disa vendeve të Bashkimit Europian, që kanë ndërprerë bashkëpunimet në industrinë e armëve me Izraelin për shkak të luftës në Gaza dhe akuzave për shkelje të të drejtave të njeriut. Slovenia ka vendosur një embargo të plotë për import, eksport dhe transit të armatimeve me Izraelin; Spanja ka ndaluar përdorimin e porteve dhe hapësirës ajrore për transport armësh drejt Tel Avivit; Belgjika ka pezulluar lejet e eksportit për materiale ushtarake; ndërsa Gjermania dhe Holanda kanë kufizuar miratimet për furnizime që mund të përdoren në Gaza. Italia, nga ana tjetër, ka deklaruar se do të pezullojë eksportet e reja, por do të respektojë kontratat ekzistuese.
Në këtë sfond të tensionuar diplomatik, përfshirja e Shqipërisë në bashkëpunime të reja me Izraelin ngre pyetje mbi drejtimin strategjik të qeverisë dhe pozicionimin e saj në raport me qëndrimin e partnerëve europianë. Analistët theksojnë se vendimet e tilla mund të ndikojnë jo vetëm në imazhin ndërkombëtar të Shqipërisë, por edhe në marrëdhëniet e saj me vende që po kërkojnë distancim nga Tel Avivi për arsye humanitare dhe politike.
