Një ngjarje e rëndë është regjistruar në afërsi të ishujve të Ksamilit, ku është gjetur i pajetë n...
AKTUALITET
Shqiptari i dëbuar nga Franca kërkon ndihmë: Familja ka ngelur atje, më kanë vendosur ndalesë
PiranjatPërditësimi i fundit 14 Mars 2026, 12:51
Istref Selmanllari, është një shqiptar që ka jetuar në Francë deri para pak kohësh, por së fundmi është dëbuar nga autoritetet franceze edhe pse gruaja dhe dy vajzat e tij mbeten në Strasburg. Ai ka treguar se vajza e madhe e familjes është e diagnostikuar me spektrin autik dhe ndjek terapi të rregullta në institucionet përgjegjëse.
Selmanllari thotë se gjatë qëndrimit të tij në Francë ka punuar vazhdimisht për të rregulluar statusin e qëndrimit, duke përfshirë një kontratë pune CDI në një kompani ndërtimi dhe duke bërë kërkesa për leje qëndrimi me të drejtë pune. Megjithatë, pas largimit nga puna dhe një procesi gjyqësor ndaj ish-punedhënësit për rroga të prapambetura, prefektura franceze i dha një urdhër dëbimi nga territori francez.
Ai ka apeluar këtë vendim duke paraqitur dokumentacionin mjekësor për vajzën e tij dhe një ofertë pune nga një pronar i ri, por kërkesa nuk i është pranuar. Në shkurt 2026, policia e ndaloi në rrugë dhe e shoqëroi për në kampin e përkohshëm të mbajtjes në Millau, por pas ndërhyrjes së avokates së shtetit, u lirua me detyrim paraqitjeje çdo 45 ditë. Në mars 2026, gjatë një seance gjyqësore administrative, kërkesa e tij për pezullimin e urdhrit të prefekturës nuk u mor parasysh dhe 5 mars, ai u nis me avion drejt Tiranës nga Franca, pa mundësi për të marrë dokumentacionin mjekësor të vajzës për të vazhduar procedurat ligjore.
Në Shqipëri ai ka zbuluar se autoritetet franceze i kanë vendosur ndalese 3-vjeçare dhe aktualisht shpenzimet e familjes për qira dhe energji mbeten të papaguara për shkak të largimit të tij.
Selmanllari apelon për ndihmë duke theksuar se nuk ka kryer asnjë shkelje penale dhe nuk ka mundësi të angazhojë avokat privat per problemin e tij.
