Protestat në Tiranë vijojnë me përplasje mes demonstruesve dhe policisë së rendit, shkruan BBC. Nxënësit e shkollave t...
AKTUALITET
Sipërfaqja e re për ndërtim, të dhënat: Bie për hotelet dhe bizneset, rritet për zyrat dhe kullat
M.B.Përditësimi i fundit 3 Shtator 2024, 07:29
TIRANA- Ekonomia po rrit ekspozimin ndaj sektorit të ndërtimit, edhe pse tregu ka dhënë shenja të ngadalësimit të shitjeve dhe frenimit të rritjes së çmimeve. Sipërfaqja e re në të cilën do të ndërtohet në vijim, sipas lejeve të dhëna në 6-mujorin e parë të 2024, ka shënuar rritje vjetore me 12%, por gjithashtu shihen tendenca të reja për llojet e objekteve që po ndërtohen.
Vitet e fundit, sipërfaqja e re për ndërtimin e hoteleve ishte në rritje të shpejtë, për shkak të zhvillimeve të vrullshme në sektorin e turizmit, por në gjysmën e parë të këtij viti ka pësuar rënie. Sipas të dhënave të detajuara të INSTAT, në janar-qershor 2024, në të gjithë vendin u dhanë 42 mijë metër katror sipërfaqe të re për hotele me rënie gati 32% në krahasim me të njëjtën periudhë të një viti më parë.
Në të kundërt, rritje të fortë shënuan sipërfaqet për zërin “Rezidenca për komunitetet” dhe ato për zyra. Sipas metodologjisë “Ndërtesat rezidente” janë ndërtime ku të paktën gjysma e sipërfaqes së objektit do të shfrytëzohet për qëllime banimi. Kjo kategori banesash përfaqëson lejet e reja të ndërtimit për kullat shumëkatëshe që u dhanë këtë vit në kryeqytet, të cilat do të përdoren për qëllim multifunksionale ku përfshihet edhe banimi. Sipërfaqja e re që do të ndërtohet në këtë kategori shënoi rritje vjetore 301% në 6-mujorin e parë.
Më tej rritje të fortë në 6-mujorin e parë të vitit shënoi sipërfaqja e re që do të ndërtohet për zyra. Sipas INSTAT, në janar-qershor u dhanë 2265 metër katror sipërfaqe e re për ndërtimin e zyrave, me rritje vjetore 244%. Të dhënat tregojnë se ka rënie të ndjeshme të sipërfaqeve që do të ndërtohen për qëllime tregtare dhe industriale. Në 6-mujorin e parë sipërfaqja e re për banesa për qëllime industriale pësoi rënie vjetore 13% dhe ajo për qëllime tregtare me -70%.
Rreth 55% e sipërfaqes së re të dhënë për ndërtim në të gjithë vendin në 6-mujorin e parë u takon lejeve të dhëna në kryeqytet. Në 6 mujorin e parë 2024 lejet e reja të ndërtimit në Tiranë sipas sipërfaqes arritën në 898,640 metër katror nga 660,452 metër katror në 6 mujorin e parë 2023. Rritja e sipërfaqes se re për ndërtim u nxit nga dhënia e lejeve për kullat shumëkatëshe në Tiranë.
Janë të paktën 8 projekte zhvillimore, që parashikojnë ngritjen e kullave që do të kenë deri në 65 kate dhe një tjetër projekt 100 kate, i prezantuar së fundmi, por që nuk e ka marrë ende lejen e zhvillimit. Në listën e KKT janë edhe disa projekte në rrugën “Dritan Hoxha” me 35 kate, apo në rrugën “Teodor Keko”, me lartësi 50 kate mbi tokë. Tashmë duket se kullat po kalojnë zonën brenda Unazës, duke u shtirë edhe në pjesën më periferike të kryeqytetit. Një projekt tjetër parashikon një kompleks shumëfunksional rezidencial me 27 kate në zonën e Kasharit./Monitor
