Ditën e Hënë vendi ynë parashikohet të ndikohe nga kushte atmosferike të qëndrueshme.
Moti parashikohet i kthjellët p...
AKTUALITET
"Sirianët, grupi më i madh!" Eurostat: Kërkesat për azil në BE bien me 21% për vitin 2024, nga Shqipëria aplikuan për mbrojtje rreth 6.8 mijë persona
M.B.Përditësimi i fundit 20 Shkurt 2025, 07:41
EUROPA- Azili nuk është më forma e preferuar për të emigruar. Për 11 mujorin e vitit 2024, sipas të dhënave të Eurostat nga Shqipëria aplikuan për mbrojtje ndërkombëtare në vendet e BE-së rreth 6.8 mijë shtetas. Numri i aplikantëve ka rënë me 21% në krahasim me të njëjtën periudhë të një viti më parë dhe është më i ulëti në të paktën një dekadë, madje edhe në krahasim me periudhën e pandemisë.
Framca vijon të jetë destinacioni kryesor i azilantëve. Ishin 2100 shtetas që kërkuan mbrojtje ndërkombëtare në shtetin francez në 11 muajt e vitit, duke përbërë 31% të totalit të aplikimeve për në vendet e BE-së. Në vend të dytë ka kaluar Italia, me 1735 aplikime, ose 26% të totalit. E treta është Gjermania, që ka përpunuar 1355 kërkesa, ose 20% të totalit. Shteti i katërt është Greqia, me 940 aplikime. Më pas renditen Belgjika (335) dhe Irlanda (165).
Në nëntor 2024, 75,045 shtetas jo të BE-së aplikuan për herë të parë për azil në vendet e Bashkimit Europian, duke shënuar një rënie prej 14% krahasuar me tetorin 2024 (86,920) dhe një rënie prej 31% krahasuar me nëntorin 2023 (108,895). Gjithashtu, pati 6,430 aplikantë të mëparshëm, duke shënuar një rënie prej 14% krahasuar me tetorin 2024 (7,475) dhe një rënie prej 5% krahasuar me nëntorin 2023 (6,740).
Sirianët mbeten grupi më i madh i azilkërkuesve
Në nëntor 2024, sirianët vazhduan të ishin grupi më i madh i personave që kërkuan azil, me 11,565 aplikantë për herë të parë, të ndjekur nga venezuelianët (7,210) dhe afganët (5,880). Gjermania (16,820), Spanja (14,925), Italia (11,620) dhe Franca (11,345) vazhduan të ishin vendet me numrin më të lartë të kërkesave për azil për herë të parë, duke përbërë 73% të totalit të aplikimeve në BE.
Shkalla e përgjithshme e aplikimeve për herë të parë në BE në nëntor 2024 ishte 16.7 për çdo njëqind mijë banorë. Krahasuar me popullsinë e secilit vend të BE-së (më 1 janar 2024), normat më të larta të kërkesave për azil u regjistruan në Greqi (79.5), e ndjekur nga Qipro (42.4), Spanja dhe Luksemburgu (30.7 secili).
Në total, 2,820 të mitur të pashoqëruar aplikuan për herë të parë për azil në BE, shumica prej tyre nga Siria (860), Egjipti (395) dhe Afganistani (385).Vendi i BE-së që pranoi numrin më të lartë të kërkesave për azil nga të miturit e pashoqëruar ishte Gjermania (875), e ndjekur nga Greqia (525) dhe Spanja (320)./ Monitor
