Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
AKTUALITET
Sot në Tiranë mbahet protesta në mbështetje të ish-krerëve të UÇK-së në Hagë, detajet e organizimit
PiranjatPërditësimi i fundit 17 Tetor 2025, 08:02
Sot, e premte 17 tetor 2025, në sheshin “Skënderbej” në Tiranë, do të zhvillohet një protestë mbarëkombëtare në mbështetje të ish-krerëve të Ushtrisë Çlirimtare të Kosovës, të cilët po përballen me procesin gjyqësor në Hagë.
Kjo protestë që do të nisë në orën 17:00, organizohet me moton “Liria ka emër” dhe pritet të mbledhë qytetarë nga të gjitha trevat shqiptare.
Vlen të theksohet se tubimi është thirrur nga Organizata e Veteranëve të Luftës së UÇK-së dhe mbështetet nga shoqata të ndryshme të ish-luftëtarëve, si dhe qytetarë nga Shqipëria, Kosova dhe diaspora.
Ndërkohë, në shenjë solidariteti me pjesëmarrësit, qeveria ka vendosur që Rruga e Kombit të jetë pa pagesë gjatë së premtes, për të lehtësuar qarkullimin e qytetarëve që udhëtojnë drejt Tiranës për protestë.
Komuna e Prishtinës, nga ana tjetër ka marrë përsipër organizimin e transportit për qytetarët që duan t’i bashkohen protestës, duke vënë në dispozicion mjete të posaçme për udhëtimin drejt Tiranës.
Kjo protestë vjen në vijim të aktiviteteve të zhvilluara ditët e fundit në Kosovë dhe në Hagë, në mbështetje të ish-presidentit Hashim Thaçi, ish-kryetarit të Kuvendit Kadri Veseli, Jakup Krasniqit dhe Rexhep Selimit, të cilët po përballen me akuzat pranë Dhomave të Specializuara.
Sakaq, organizatorët e protestës kanë bërë thirrje për një tubim paqësor dhe dinjitoz, si shprehje e unitetit dhe e kërkesës për drejtësi për ish-krerët e UÇK-së.
Një protestë e ngjashme është zhvilluar më herët në Hagë, teksa pritet që në vijim një protestë e tillë të zhvillohet edhe në Shkup.
