Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
AKTUALITET
"Standardi zviceran" skualifikohet nga Komisioni i Pavarur i Kualifikimit
M.B.Përditësimi i fundit 8 Tetor 2024, 17:34
Xhemal Saliaj dhe Aurela Saliaj
TIRANA- Prokurori i Vlorës, Xhemal Saliaj u shkarkua të hënën nga Komisioni i Pavarur i Kualifikimit, KPK, pas problemeve dhe barrave të provës në kriterin e pasurisë dhe gjetjet për profesionalizmin. Mesa duket standardi zviceran i prokurorit, siç ka deklaruar bashkëshortja e tij, nuk ka mjaftuar për të plotësuar standardet shqiptare të KPK-së.
Kështu, Komisioni i Pavarur i Kualifikimit nxjerr "bllof" rektoren e Univesitetit të Vlorës, "Ismail Qemali", Aurela Saliaj, e cila në qershor të këtij viti, pasi fitoi zgjedhjet brenda Universitetit për postin që mori, festoi këtë arritje dhe u shpreh se bashkëshorti ka qenë mbështetësi i saj kryesor dhe kur ajo nuk ka qenë prezente në shtëpi, pasi i është dashur të merret me punët e fakultetit dhe ai e ka përkrahur.
Sipas saj ky ishte një “standard zviceran” dhe aspak shqiptar. Por pavarësisht ndihmës që Xhemal Saliaj supozohet që i jepte së shoqes bazuar në standardin zviceran, duket se ky i fundit nuk e ka shoqëruar atë në vetë profesionin e tij, ose të paktën nuk paska qenë i mjaftueshëm.
“Është ajo shprehja që pas çdo burri të suksseshëm qëndron një grua e fuqishme. Por, ama dhe pas çdo gruaje të suksesshme qëndron një burrë progresiv që ka vizion dhe beson në të ardhmen. Unë kam pasur fatin dy burra progresiv pas shpatullave të mia, bashkëshortin tim padiskutim që dua ta falenderoj publikisht, megjithëse më tha sot s’do vij se ti je me njerëzit e tu atje dhe nuk dua të ndërhyj.
Por, ka qenë ai që çdo punë që unë kam pasur, sa herë unë i kam thënë kam një punë për të bërë për fakultetin ai më ka thënë lëmë mua se unë rregullohem vetë. Ky është një standard zvicerian që një të huaji nuk do i duket një hata, por ne që jetojmë në Shqipëri e dimë që nuk është standard normal për familjet shqiptare. Prandaj unë i jam falenderuese burrit tim”, tha Aurela Saliaj në qershor 2024.
Nga ana tjetër, Xhemal Saliaj i kundërshtoi gjetje e KPK-së dhe pati kërkuar konfirmim në detyrë, por trupa e kryesuar nga Alma Faskaj, me relatore Pamela Qirkon dhe anëtare Xhensila Pinen, i ka gjetur problemet e konstatuara të mjaftueshme për të sjellë shkarkimin. Në cilësinë e vëzhguesit ndërkombëtar ishte i pranishëm Theo Jacobs.
Xhemal Saliaj e ka filluar karrierën në sistemin e drejtësisë në vitin 2003 si prokuror në Prokurorinë e Beratit, ku ka ushtruar dhe funksionin e drejtuesit. Prej vitit 2013, ai e ushtron detyrën në Prokurorinë e Rrethit Vlorë.
