Të dhënat: Ankesat e qytetarëve në AKEP u pesëfishuan vitin e kaluar

Foto ilustruese

TIRANA- Ankesat e përdoruesve në Autoritetin e Komunikimeve Elektronike dhe Postare (AKEP) u pesëfishuan gjatë vitit 2023. Sipas informacionit nga AKEP, vitin e kaluar u depozituan në këtë institucion 2123 ankesa nga pajtimtarët e shërbimeve të komunikimeve elektronike publike, në krahasim me 415 ankesa të paraqitura në vitin 2022. 1371 ankesa apo 65% e totalit ishin në lidhje me problematikat e hasura në refuzimin e kërkesave për bartjen e numrit celular nga operatori transferues. 752 ankesa apo rreth 35% e totalit ishin për problematika të tjera si faturimi, pengesat apo vonesat për mbylljen e kontratës apo kalimin nga plane tarifore paspagesë në ato me parapagesë, cilësinë e shërbimit, penalitete për përfundim të parakohshëm të kontratës nga pajtimtari në rast ndryshimi të adresës së pajtimtarit, etj.

Rreth 90% e volumit të ankesave të depozituara në AKEP në vitin 2023 ishin për sipërmarrësin One Albania, kryesisht për portimin e numrit dhe problematika të lidhura me faturimin dhe aspekte të ndryshme të cilësisë së shërbimit të ofruar për pajtimtarët. Vitin e kaluar, One Albania kaloi një proces të ndërlikuar teknik bashkimi mes dy ish-operatorëve, ONE Telecommunications dhe Albtelecom, proces që u reflektua edhe me probleme në shërbimin për klientët. Në vijim të problematikave të konstatuara dhe numrit të konsiderueshëm të ankesave, AKEP ka kryer disa inspektime pranë sipërmarrësit One Albania në vitin 2023, duke kërkuar trajtimin e problematikave të evidentuara nga ankesat e pajtimtarëve, si dhe duke vendosur masë administrative me gjobë, në vlerën e 10 milionë lekëve.

Masa administrative është vendosur me propozimin e grupit të inspektimit, për shkak të shkeljeve dhe parregullsive të gjetura nga inspektimi i fundit i kryer në këtë kompani, më datë 29 gusht të vitit të kaluar. Arsyeja kryesore që ka çuar në ndëshkimin me gjobë të One Albania ka qenë mosrespektimi i afateve ligjore të njoftimit përpara ndërprerjes së shërbimit për abonentët me kontratë, sipas parashikimeve të nenit 109 të ligjit “Për komunikimet elektronike”. Ligji përcakton se operatori i komunikimeve elektronike mund të ndëshkohet me gjobë nga 10 milionë lekë deri në 50 milionë lekë, nëse kufizon akesin në shërbimet e tij, ndërpret ose përfundon kontratën e pajtimtarëve në kundërshtim me përcaktimin e kontratës.

Këshilli Drejtues i AKEP ka vlerësuar se dënimi me gjobë, në kufirin minimal të përcaktuar nga ligji, përbën masën adekuate dhe proporcionale për të sanksionuar shkeljen e evidentuar. Në vendim, Këshilli Drejtues theksoi rëndësinë thelbësore të respektimit rigoroz të të drejtave të pajtimtarit nga sipërmarrësi i komunikimeve elektronike dhe nevojën për marrjen e të gjitha masave të nevojshme dhe të shpejta për sigurimin efektiv të këtyre të drejtave. Sipërmarrësi One Albania ka qenë, fillimisht, subjekt i një inspektimi të programuar, zhvilluar prej datës 6 mars 2023 deri në datën 4 maj 2023, në përfundim të të cilit u konstatuan disa shkelje dhe u lanë rekomandime për korrigjimin e tyre.

Ndërkohë, në vijim të problematikave të konstatuara nga AKEP, një numri të konsiderueshëm ankesash dhe ndërprerjes së plotë të shërbimit më datë 24 gusht 2023, u krye një procedurë e re inspektimi, me objekt plotësimin e rekomandimeve nga inspektimi i mëparshëm dhe trajtimi i problematikave të evidentuara edhe nga ankesat e pajtimtarëve të ndryshëm. Në përfundim të procedurës së dytë, grupi i inspektimit propozoi masën administrative me gjobë, që u miratua nga Këshillit Drejtues i AKEP. Sipas AKEP, operatori One Albania e ka ekzekutuar (paguar) gjobën në mënyrë vullnetare./Monitor

akep