Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
AKTUALITET
"Të hetohet çdokush që ka keqpërdorur detyrën"/ Shoqata e Avokatëve Penalistë të Shqipërisë kërkon lirimin e menjëhershëm nga burgu të avokatit Ulian Bajrami
PiranjatPërditësimi i fundit 19 Tetor 2025, 11:29
Shoqata e Avokatëve Penalistë të Shqipërisë ka reaguar ndaj arrestimit të avokatit Ulian Bajrami, duke e konsideruar këtë veprim si një cënim të rëndë të lirisë dhe pavarësisë së avokatisë. Në një deklaratë zyrtare, Shoqata dënon ndalimin e Bajramit dhe kërkon lirimin e tij të menjëhershëm.
Gjithashtu, Shoqata kërkon që të merren masa disiplinore dhe ligjore ndaj çdo funksionari publik që ka ushtruar presion apo intimidim ndaj avokatëve gjatë ushtrimit të detyrës së tyre.
Deklarata e plotë:
Shoqata e Avokatëve Penalistë të Shqipërisë shpreh indinjatën e saj të thellë dhe dënon me forcë aktin e paprecedentë të arrestimit të avokatit Ulian Bajrami gjatë ushtrimit të detyrës së tij me përfundimin e një seance gjyqësore, pas një debati gjazë gjykimit me përfaqësuesin e organit të akuzës.
Sipas informacioneve të bëra publike dhe audios së seancës gjyqësore, avokati Ulian Bajrami u arrestua vetëm për faktin se i komunikoi prokurorit synimin për të bërë kallëzim penal, pasi sipas avokatit ky i fundit kishte manipuluar provat në dëm të klientit që ai mbronte.
Ky veprim përbën një sulm të drejtpërdrejtë ndaj pavarësisë së profesionit të avokatit, duke cenuar rëndë parimin kushtetues të së drejtës për mbrojtje të pavarur dhe efektive, të garantuar nga neni 31 i Kushtetutës dhe neni 6 i Konventës Europiane për të Drejtat e Njeriut.
Avokati, si pjesë thelbësore e sistemit të drejtësisë, nuk mund dhe nuk duhet të ndëshkohet për ushtrimin e funksionit të tij ligjor në mbrojtje të interesave të qytetarit dhe përballjen e abuzimeve të pushtetit.
Arrestimi i një avokati për shkak të ushtrimit të detyrës është një akt i papranueshëm, që dëmton seriozisht besimin e publikut tek drejtësia dhe cënon ekuilibrin e procesit të rregullt ligjor.
Shoqata e Avokatëve Penalistë të Shqipërisë kërkon:
-Lirimin e menjëhershëm dhe pa kushte të avokatit të arrestuar;
-Hetim të plotë, të pavarur dhe transparent mbi veprimet e autoriteteve përgjegjëse;
-Marrjen e masave disiplinore dhe ligjore ndaj çdo funksionari që ka keqpërdorur detyrën publike për të intimiduar përfaqësuesin e mbrojtjes;
-Garanci institucionale që ngjarje të tilla të mos përsëriten më.
“Ky akt është një shkelje e rëndë e parimeve themelore të shtetit të së drejtës.
Arrestimi i një avokati për shkak se ai kërkon zbatimin e ligjit është një mesazh frikësues për të gjithë trupën e avokatëve dhe për qytetarët që kërkojnë drejtësi.
Shoqata e Avokatëve Penalistë të Shqipërisë nuk do të heshtë dhe të lejojë që pavarësia e mbrojtjes të shndërrohet në objekt presioni apo ndëshkimi.”
