Tentativë vrasje në Vaun e Dejës/ Qëlloi me armë drejt bashkëshortes dhe e dëmtoi me xham në qafë, vihet në pranga 68-vjeçari

foto ilustruese

VAU I DEJËS- Një 68-vjeçar është vënë në pranga në Vaun e Dejës për shkak se tentoi të vriste bashkëshorten e tij. Xhabir Hoxhaj ka qëlluar 2 herë me çifte në drejtim të bashkëshortes për ta vrarë dhe më pas e ka goditur me grushte në fytyrë dhe e ka dëmtuar me xham në pjesën e qafës dhe shpatullës.

61-vjeçarja ndodhet nën kujdesin e mjekëve jashtë rrezikut për jetën, ndërsa sipas informacioneve policore, ngjarja dyshohet se ka ndodhur për motive xhelozie. Policia ka sekuestruar në cilësinë e provës materiale çiften, dy gëzhoja dhe 17 fishekë armë gjahu.

NJOFTIMI I POLICISË: 

Vau i Dejës/Qëlloi me armë gjahu çifte drejt bashkëshortes, me qëllim vrasjen e saj, kapet dhe vihet në pranga 68-vjeçari.

Policia sekuestroi në cilësinë e provës materiale armën e gjahut çifte.

Shërbimet e Komisariatit të Policisë Vau i Dejës pas njoftimit të marrë se një shtetase nga Vau i Dejës po transportohej për ndihmë mjekësore drejt spitalit të Shkodrës pasi dyshohej se ishte dhunuar nga bashkëshorti, menjëherë kanë organizuar punën për sqarimin rrethanave, kapjen dhe arrestimin autorit.

Në bashkëpunim me Sektorin për Krimet e Rënda në Drejtorinë Vendore të Policisë Shkodër u bë kapja e shtetasit Xhabir Hoxhaj, 68 vjeç, banues në fshatin Mjedë dhe arrestimi në flagrancë i tij për veprën penale “Vrasja për shkak të marrëdhënieve familjare” e mbetur në tentativë.

Nga veprimet e para hetimore dyshohet se 68-vjeçari, për motive të dobëta (xhelozie) ka qëlluar 2 herë me armë gjahu çifte në drejtim të bashkëshortes për ta vrarë dhe më pas e ka goditur me grushte në fytyrë dhe e ka dëmtuar me mjet prerës (xham) në pjesën e qafës dhe shpatullës.

61-vjeçarja shtetasja Gj.H, ndodhet nën kujdesin e mjekëve jashtë rrezikut për jetën.

Në cilësinë e provës materiale është sekuestruar arma e gjahut çifte, dy gëzhoja dhe 17 fishekë armë gjahu.

Materialet procedurale i kaluan Prokurorisë, për veprime të mëtejshme.

tentative vrasje ne vaun e dejes