Trafiku i armëve Kosovë-Shqipëri, djali i Ad Sybardhit sërish protagonist 

TIRANA- Mes emrave të arrestuar për trafikun e armëve nga Kosova e Shqipëria, është edhe Euxhenio Manushi, djali i muzikantit Adriano Manushi i njohur si Ad Sybardhi. I riu është arrestuar në flagrancë nga Antidroga e Tiranës tek rrethi i Kamzës 3 ditë më parë, më 9 dhjetor, teksa udhëtonte në mjetin që drejtohej nga 24-vjeçari Klaudio Serjani, të cilit iu gjet një sasi prej 1.5 kg kokainë, me vlerë në treg 270.000 euro.

Ditën e sotme Prokuroria e Tiranës ka dalë me reagim zyrtar lidhur me operacionin e kryer për goditjen e trafikut të armëve Kosovë-Shqipëri.  Bëhet me dije se hetimet për goditjen e grupit kriminal kanë nisur prej 9 muajsh dhe se gjithashtu janë lëshuar 14 urdhërarreste, ku 8 persona janë arrestuar në Kosovë dhe 6 në Shqipëri.

Në pranga në vendin tonë janë vënë sipas njoftimit të Prokurorisë: Euxhenio Manushi, 20-vjeç; Endri Papa, 34-vjeç; Aurel Manreka, 28 vjeç; Gersi Llozha, 22 vjeç; Kleo Muçalliu 26-vjeç dhe Tonin Shkambi, 53-vjeç.  Gjatë këtij operacioni u sekuestruan 22 armë zjarri ‘Zoraki’, një armë zjarri Ak 47, një granatë dore ofensive dhe 470 fisheke të llojeve të ndryshme. Gjithashtu u sekuestruan edhe 3 automjete dhe shuma të konsiderueshme parash e 10 aparate celulare.

kosova shqiperia