Kryetari i Partisë Demokratike Sali Berisha, ka sjellë në vëmendje një deklaratë të eurodeputetit Tomáš Zdech...
AKTUALITET
Transporti/ Rritje e ndjeshme e pasagjerëve nga ajri, rënie përmes detit
n.fPërditësimi i fundit 29 Tetor 2024, 16:43
Foto ilustruese
TIRANË- Statistikat e INSTAT për tremujorin e tretë tregojnë një rritje të ndjeshme të udhëtarëve që fluturojnë përmes ajrit, i ndikuar nga fluksi i lartë i turistëve që viziton vendin, por dhe daljet e shqiptarëve të nxitura nga fluturimet me kosto të ulët.
Në të kundërt, transport ii udhëtarëve përmes detit ka shënuar një rënie të lehtë në tremujorin e tretë në raport me të njëjtën periudhë të një viti më parë.
Pasagjerët nga ajri rriten 42.7%
Sipas INSTAT, në tremujorin e tretë 2024, kanë udhëtuar me linja ajrore 3.534.751 pasagjerë, nga 2.476.244 pasagjerë që kanë udhëtuar në të njëjtën periudhë të vitit të kaluar, duke u rritur me 42,7 %.
Në transportin ajror gjatë tremujorit të tretë 2024, kanë operuar 28 shoqëri ajrore, nga këto 27 janë shoqëri të huaja dhe 1 shoqëri shqiptare. Në hapësirën ajrore shqiptare kanë fluturuar 132.713 avionë, nga të cilët 83,7 % të tyre e zë numri i mbikalimeve.
Volumi i mallrave (duke përfshirë postën) të hyrë dhe të dalë nëpërmjet transportit ajror rezultoi 570,8 ton, nga të cilat 71,6 % janë mallra të hyrë dhe 28,4 % janë mallra të dalë. Krahasuar me tremujorin e tretë 2023, volumi i mallrave paraqitet me rritje 16,4 %.
Në transportin ajror, mallrat e transportuara me postë zënë 10,1 % të volumit gjithsej të mallrave të transportuar me ajër. Krahasuar me tremujorin e tretë 2023, volumi i mallrave të transportuara me postë paraqitet me rritje 9,7 %.
Volumi i mallrave të tregtuara (eksport dhe import) me ajër, në tremujorin e tretë 2024 është 463 ton. Krahasuar me të njëjtën periudhë të vitit 2023, ky tregues është rritur me 15,4 %. Volumi i mallrave të importuara me ajër në tremujorin e tretë 2024, zë 0,02 % ndaj volumit gjithsej të mallrave të importuara.
Transporti detar, nga deti po udhëtohet më pak
Numri i pasagjerëve që kanë udhëtuar nëpërmjet porteve detare në vend është 950.100 persona, me rënie rreth 4% me bazë vjetore. Porti i Durrësit është porti nga i cili kanë udhëtuar 44,0 % e pasagjerëve, ndjekur nga porti i Sarandës me 41,2 % dhe më pas porti i Vlorës me 14,8 %.
Në Shqipëri operojnë katër porte detare të cilët shërbejnë për transport mallrash: Porti i Durrësit, i Vlorës, i Shëngjinit dhe porti i Limjonit (Sarandë). Porti i Durrësit është porti kryesor në vend prej të cilit gjatë tremujorit të tretë 2024, janë transportuar 94,5 % e volumit të mallrave të transportuar me det, ose 1.818 mijë ton mallra. Volumi gjithsej i mallrave të transportuara nga porti i Durrësit është rritur me 12,3 %, krahasuar me të njëjtën periudhë të një viti më pare.
Llojet e grup-mallrave kryesore të transportuara nëpërmjet rrugëve detare sipas klasifikimit, NST 2007 (Nomeklatura e Statistikave të Transportit), për tremujorin e tretë 2024 paraqiten si më poshtë:
Numri i anijeve të hyra dhe të dala nga portet në vend rezulton 238 anije, nga këto 220 anije janë të huaja dhe 18 anije vendase. Numri i anijeve të hyra dhe të dala në porte është rritur me 29,3 %, ku numri anijeve të huaja është rritur me 35,0 %, krahasuar me tremujorin e tretë 2023.
Portet detare ku kryhet transporti pasagjerëve në vend janë: Porti i Durrësit, i Vlorës, i Sarandës dhe porti i Shëngjinit. Lëvizja e pasagjerëve në tremujorin e tretë 2024, është kryer nga porti i Durrësit, i Vlorës dhe porti i Sarandës.
Në tremujorin e tretë 2024, volumi i mallrave të tregtuara me det (eksport dhe import), është 1.433 mijë ton. Krahasuar me të njëjtën periudhë të vitit 2023, ky tregues është rritur me 9,5 %. Volumi i mallrave të eksportuara me det në tremujorin e tretë 2024 zë 42,6 %, ndaj totalit të volumit gjithsej të mallrave të eksportuara. Volumi i mallrave të importuara me det në tremujorin e tretë 2024 zë 63,3 %, ndaj totalit të volumit gjithsej të mallrave të importuara./ Monitor
