U kap në flagrancë duke i shitur heroinë një personi, arrestohet 41-vjeçari në Fier

FIER- Një 41-vjeçar është arrestuar ditën e sotme në Fier. Mësohet se G.C 41 vjeç, u kap në flagrancë duke i shitur doza heroine K.S.

Pas kontrollit në banesën e 41-vjeçarit u gjetën dhe sekuestruan sasi heroine, 1 peshore elektronike, dhe një sasi metadoni. Materialet procedurale i kaluan Prokurorisë për veprime të mëtejshme.

Njoftimi i policisë:

Drejtoria Vendore e Policisë Fier

Sektori për Hetimin e Narkotikëve i DVP Fier, në kuadër të megaoperacionit “Tempulli”, arrestoi shtetasin G. C., 41 vjeç, banues në Lushnjë, pasi ky shtetas u kap në flagrancë nga shërbimet e Policisë duke i shitur një sasi të vogël lënde të dyshuar narkotike heroinë, shtetasit K. S., i cili u procedua penalisht. Nga kontrolli i banesës së shtetasit G. C., shërbimet e Policisë gjetën dhe sekuestruan një sasi të vogël lënde të dyshuar narkotike heroinë, 1 peshore elektronike, dhe një sasi metadoni.

Policia Rrugore arrestoi shtetasin H. Sh., 46 vjeç, banues në fshatin Ballagat, Lushnjë, pasi u konstatua nga shërbimet e Policisë duke drejtuar automjetin në gjendje të dehur.

Komisariati i Policisë Fier ndaloi shtetasin e shpallur në kërkim N. C., 25 vjeç, banues në Fier, pasi Gjykata e Fierit e ka dënuar këtë shtetas me 1 vit dhe 3 muaj për veprën penale “Vjedhje”.

Gjithashtu nga Komisariati i Policisë Fier u referuan materialet në Prokurori ku nisi procedimi penal për shtetasin Xh. V., 30 vjeç, banues në Fier, pasi nga kontrolli në lokalin në pronësi të tij, shërbimet e Policisë i gjetën në aparatet celulare të këtij shtetasi, faqe të ngjashme me ato të lojrave të fatit. Në cilësinë e provës materiale u sekuestruan 2 aparate celular.

Materialet procedurale i kaluan Prokurorisë për veprime të mëtejshme.

fier