U kap në flagrancë teksa ujiste 520 bimë narkotike, arrestohet 37-vjeçari në Mirditë, procedohet edhe kryeplaku i fshatit Shërmi

Foto ilustruese

MIRDITË- Një 37-vjeçar është vënë në pranga nga policia në Mirditë. Mësohet se arrestimi i tij ka ardhur pasi ai u kap në flagrancë teksa ujiste 520 bimë drogë.

Më tej policia bën me dije se 37-vjeçati me inicialet F. N. ishte i dënuar edhe më parë për veprat penale “Vjedhja me dhunë” dhe “Kultivimi i bimëve narkotike”. Gjithashtu në lidhje me këtë operacion është proceduar edhe kryeplaku i fshatit Shërmi nën  akuzën për veprën penale “Shpërdorimi i detyrës”.

Njoftimi:

Mirditë/ Kontrolle intensive dhe finalizim të operacioneve proaktive, për parandalimin dhe goditjen e kultivimit të bimëve narkotike. Finalizohet operacioni policor i koduar “DOUBLE”. Po ujiste 520 bimë narkotike, kapet në flagrancë dhe vihet në pranga 37-vjeçari. Në zbatim të masave të përcaktuara në planin operacional kombëtar “Territor i pastër”, shërbimet e Komisariatit të Policisë Mirditë, në bashkëpunim me Seksionin për Mbështetjen Operacionale të Hetimit të DVP Lezhë, bazuar në informacionet e siguruara si rezultat i një hetimi proaktiv njëmujor, në bashkëpunim me Prokurorinë, finalizuan me sukses operacionin e koduar “DOUBLE”.

Si rezultat i këtij operacioni, u godit një rast i kultivimit të bimëve narkotike dhe u arrestua në flagrancë shtetasi: F.N, 37 vjeç, banues në fshatin Shëmri, njësia administrative Orosh, bashkia Mirditë, i dënuar më parë për veprat penale “Vjedhja me dhunë” dhe “Kultivimi i bimëve narkotike”. Ky shtetas dyshohet se në hapësirën e pyllit në afërsi të fshatit ku banonte, kishte kultivuar 520 bimë të dyshuara narkotike cannabis sativa. Gjatë operacionit të zhvilluar në orët e para të mëngjesit, ky shtetas u kap në flagrancë duke u kujdesur për bimët narkotike.

Në vijim të veprimeve procedurale, nisi procedimi në gjendje të lirë për veprën penale “Shpërdorimi i detyrës”, për shtetasin S. Ll., me detyrë kryeplak i fshatit Shëmri, dhe për shtetasin Gj. Gj., me detyrë specialist i pyjeve, pasi dyshohet se nuk kanë kryer detyrën e tyre funksionale, në zonën që mbulojnë.

Në bashkëpunim me Prokurorinë e Juridiksionit të Përgjithshëm Lezhë vijon puna për identifikimin dhe vënien para përgjegjësisë ligjore të shtetasve të tjerë të përfshirë në këtë veprimtari kriminale. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme”, thuhet në njoftimin e policisë.

mirdite droge