U kap në gjendje të dehur në timon, arrestohet 35-vjeçarja në Fier

foto ilustruese

FIER- Arrestohet një person dhe procedohen tre të tjerë në Fier për vepra të ndryshme penale. Mësohet se është arrestuar 35-vjeçarja E.D pasi u kap duke drejtuar automjetin e dehur.

Tre persona të tjerë janë proceduar të lirë për veprat penale dëmtimi i një këmbësoreje me automjet si dhe punimet pa leje në banesë.

Gjithashtu bëhet me dije se 42-vjeçarja e cila u shpall e humbur para disa ditësh është gjetur në gjendje të mirë shëndetësore.

Njoftimi i Policisë:

Drejtoria Vendore e Policisë Fier

Policia Rrugore arrestoi shtetasen E. D., 35 vjeçe, banuese në fshatin Novoselë, pasi u konstatua nga shërbimet e Policisë, duke drejtuar automjetin, në gjendje të dehur.

Gjithashtu, referoi materialet në Prokurori ku nisi procedimi në gjendje të lirë për shtetasin M. P., 35 vjeç, banues në Fier, pasi me automjetin që drejtonte, ka dëmtuar lehtë shtetasen E. M., këmbësore.  

Komisariati i Policisë Fier referoi materialet në Prokurori ku nisi procedimi në gjendje të lirë për shtetasit E. B., 32 vjeç, dhe A. Gj., 34 vjeç, të dy banues në fshatin Petovë, pasi janë konstatuar nga shërbimet e Policisë, duke kryer punime pa leje, në banesat e tyre. 

Materialet procedurale i kaluan Prokurorisë, për veprime të mëtejshme.

Në vijim të informacionit të dhënë më datë 08.06.2024, për largimin nga banesa të një shtetaseje 42 vjeçe, ju informojmë se kjo shtetase është gjetur dhe është kthyer në familje, në gjendje të mirë shëndetësore.  

Mesditën e djeshme, në fshatin Darëzezë, Fier, dyshohet se nga një shkëndijë elektrike në shtyllat e tensionit të lartë, ka rënë zjarr dhe nga përhapja e flakëve janë djegur tokat e 3 banorëve të këtij fshati. Grupi hetimor po punon për dokumentimin ligjor dhe sqarimin e plotë të rrethanave të rastit.

fier