U prezantuan si policë dhe i morën paratë me forcë një 36-vjeçari, arrestohen dy efektivët e rremë në Bulqizë, njëri prej tyre i dënuar disa herë

Foto ilustruese

BULQIZË- Dy persona janë vënë në pranga ditën e sotme në Bulqizë. Të arrestuarit u vendosën në pranga pasi u prezantuan si punonjës policie dhe i morën një 36-vjeçari një shumë parash me forcë. 

36-vjeçari ka denoncuar rastin dhe më pas dy autorët janë identifikuar dhe arrestuar. Sipas njoftimit të policisë njëri prej të arrestuarve ishte i dënuar disa herë për vepra penale kundër personit dhe pronës.

Njoftimi:

Bulqizë/ Finalizohet operacioni policor i koduar “Prezantimi”. Iu prezantuan si punonjës policie dhe i morën me forcë, një shtetasi në rrugë, një shumë parash, identifikohen dhe arrestohen, si rezultat i veprimeve të shpejta policore, 2 autorët. Njëri nga të arrestuarit, i dënuar më parë për krime kundër personit dhe pronës.

Menjëherë pas kallëzimit të një 36-vjeçari, se rreth orës 22:00 të datës 21.05.2024, 2 shtetas që i ishin prezantuar si punonjës policie, i kishin marrë me forcë, në rrugë, një shumë të vogël parash, Komisariati i Policisë Bulqizë ka organizuar punën për identifikimin dhe kapjen e autorëve.

Si rezultat i veprimeve të shpejta hetimore dhe policore, të kryera në kuadër të operacionit “Prezantimi”, u vunë në pranga shtetasit D. T., 26 vjeç (i dënuar disa herë, për vepra penale kundër personit dhe pronës) dhe V. B., 36 vjeç, të dy banues në Bulqizë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme, për veprat "Vjedhja me dhunë" dhe "Përvetësimi i titullit apo i detyrës shtetërore".

bulqize arrestim