Identifikohet 16-vjeçari që humbi jetën në aksidentin me motor në Shkodër
Është bërë i ditur identiteti i...
AKTUALITET
Ulet inflacioni i brendshëm në ekonominë vendase, presionet e jashtme për rritjen e çmimeve përsëri në rritje
b.zPërditësimi i fundit 25 Shkurt 2025, 15:40
Foto ilustruese
TIRANË - Inflacioni i brendshëm në ekonominë shqiptare u ngadalësua në tremujorin e fundit të kaluar, ndërsa ai i importuar erdhi në rritje.
Informacioni i zbërthyer mbi strukturën e inflacionit, sipas Bankës së Shqipërisë, tregon se tremujori i fundit ka sjellë një ndryshim të kontributit të ekonomisë së brendshme dhe asaj të jashtme në inflacion.
Nëse për nëntë muajt e parë të vitit inflacioni i jashtëm kishte qenë në rënie, në tremujorin e fundit ndodhi e kundërta dhe presionet për rritjen e çmimeve nga jashtë u rritën, ndërkohë që ato të brendshme erdhën në rënie.
Sipas Bankës së Shqipërisë, inflacioni i brendshëm regjistroi një mesatare prej 1.8% në tremujorin e fundit, duke shënuar një ngadalësim prej 0.3 pikë përqindjeje krahasuar me periudhën e mëparshme. Megjithatë, ai vazhdoi të jetpte kontributin kryesor në formimin e inflacionit në ekonomi, me rreth 70% të inflacionit total.
Nga ana tjetër, inflacioni i importuar u zgjerua nga në 3.1% në tremujorin e fundit të vitit 2024, nga 1.7% që kishte qenë një tremujor më parë. Rritja e tij ka pasqyruar ecurinë e çmimeve të naftës e të disa ushqimeve të përpunuara, si dhe stabilizimin e kursit të këmbimit. Kjo ka sjellë zgjerimin e kontributeve të inflacionit të importuar, megjithëse ky tregues mbetet ende pranë niveleve më të ulëta historike.
Nga ana tjetër, presionet e brendshme ishin relativisht të qëndrueshme. Profili mbizotërues në inflacionin total nga komponentët më afatgjatë të tij, është ndihmuar kryesisht nga qëndrueshmëria e inflacionit të shërbimeve dhe të mallrave industriale.
Si rezultat, Banka e Shqipërisë vëren se trajektoret e matjeve të inflacionit bazë kanë mbetur pranë mesatareve të dekadës së fundit, ndërsa ajo e inflacionit të brendshëm qëndron lehtësisht nën mesataren përkatëse.
Inflacioni në tremujorin e katërt mbeti thuajse i pandryshuar nga ai i një tremujori më parë, në nivelin 2%, i ndikuar kryesisht nga vlerat e qëndrueshme të inflacionit bazë.
Inflacioni bazë arriti mesatarisht në 2.3% gjatë tremujorit të fundit, një vlerë e përafërt kjo me tremujorin e mëparshëm dhe më e lartë se inflacioni total. Inflacioni bazë llogaritet nga Banka e Shqipërisë për një grup mallrash dhe shërbimesh që zënë 69% të peshës në shportën e përgjithshme të Indeksit të Çmimeve të Konsumit. Inflacioni bazë përjashton ato produkte që zakonisht kanë luhatshmëri të lartë, kryesisht produktet ushqimore dhe ato energjetike.
Nga ana tjetër, inflacioni jobazë rezultoi rreth 1.3%, normë kjo e përafërt me atë të një tremujori më parë. Matjet tregojnë se inflacioni bazë kontribuoi 80% në formimin e inflacionit në këtë periudhë.
Për të gjithë vitin 2024, inflacioni mesatar në Shqipëri rezultoi 2.2%, në rënie të ndjeshme nga niveli 4.8% i vitit 2023./ Monitor
