Gazetari Osman Stafa ka publikuar pamjet nga kamera e sigurisë së një prej bizneseve në zonën e Medresesë, aty ku më herë...
AKTUALITET
Vatër e re zjarri në Kukës/ Flakët shpërthejnë minat luftarake nga lufta e Kosovës, forcat ushtarake në terren
S.BPërditësimi i fundit 27 Korrik 2024, 18:17
pamje nga zjarret
KUKËS- Një tjetër vatër zjarri është aktivizuar në qarkun e Kukësit. Gjatë pasdites, zjarri u shfaq në vendin e quajtur Fierza e Qemës, në fshatin Kishaj të bashkisë Has.
Zjarri ka përfshirë masivin pyjor të këtij fshati, në një terren të vështirë dhe të largët nga rrugët automobilistike. Ekipet e shërbimit zjarrfikës të bashkisë Has, bashkë me punonjësit e shërbimit pyjor, janë nisur drejt vendit të ngjarjes për të luftuar flakët. Ndërkohë, në dy vatrat e tjera aktive, në Zogaj të Tropojës dhe Letaj të Hasit, po punohet për izolimin e tyre.
Sipas burimeve në vendngjarje, janë angazhuar rreth 200 forca, prej të cilave 100 i përkasin ushtarëve Komando, ndërsa pjesa tjetër janë zjarrfikës dhe punonjës të tjerë. Në fshatin Peraj të Hasit, pranë kufirit me Gjakovën, zjarri ka shpërthyer disa mina luftarake, prezenca e të cilave mendohet të jetë që prej luftës në Kosovë në vitin 1999.
Për shkak të kësaj situate, punonjësit e shërbimeve zjarrfikëse kanë ndërprerë punën, duke ia lënë vendin forcave ushtarake që do të monitorojnë situatën në mënyrë të specializuar. Vatrat e zjarrit po ndikohen nga temperaturat e larta, thatësira dhe erërat e forta të zonës.
Për momentin bëhet me dije se vatrat e zjarrit nuk rrezikojnë banesat e fshatrave përreth.
