Vdekja e 12-vjeçarit nga Maliqi, i mituri përcillet sot për në banesën e fundit, familja në zi

MALIQ- Përcillet sot për në banesën e fundit, 12-vjeçari i cili ndërroi jetë papritur në spitalin e Traumës në Tiranë. I mituri është paraqitur në spital rreth 10 ditë më parë me simptoma gripi dhe ka dalë nga spitali me datë 31 dhjetor, pasi gjendja e tij shëndetësore është përmisuar.

Gjendja e tij me të vjella është përsëritur, teksa ka shkuar sërish në spital, ku më pas ka rezultuar se kishte gliceminë. Gjithashtu i mituri është dërguar mëngjesin e dy ditëve më parë në urgjencën e Korçës me tension të lartë, ndërsa pas kontrollit është nisur menjëherë drejt Tiranës për mjekim të specializuar.

Ndërsa mësohet se mbrëmjen e dy ditëve më parë ka pësuar arrest kardiak. Për shkak të moshës së re dhe rrethanave të vdekjes së papritur, policia ka nisur hetimet lidhur me rastin për të zbuluar shkaqet e vdekjes së të miturit. Ndërkohë familjarët e 12-vjeçarit kanë shpjeguar për mediat, jashtë kamerave, se djali i tyre ka qenë i shëndetshëm dhe nuk kishte pasur asnjë problem shëndetësor më parë, duke u marrë edhe me aktivitet sportiv.

Ata tregojnë se në fund të dhjetorit, djali kishte shkuar në spitalin e Korçës me simptoma të gripit, ku ishte trajtuar në reanimacion. Gjithashtu familjarët shpjegojnë se, pasi djali kishte filluar të kishte të vjella të pandërprera, ata e kishin komunikuar këtë me infermieren, por ajo u kishte thënë se “nuk ka mundësi”. Ata theksojnë se djalin nuk e trajtuan siç duhej, dhe në një moment, ai kishte shtërnguar gjoksin fort.

Ata e kishin marrë në krahë për ta çuar tek urgjenca e pediatrisë, por gjatë rrugës djali ka humbur jetën në krahët e tyre. Lidhur me vdekjen e 12-vjecarit reagoi dje edhe QSUT. Në njoftimin e shpërndarë për mediat, QSUT sqaroi se 12-vjeçari është diagnostikuar me miokardit akut, një sëmundje e rrallë dhe e rrezikshme, e cila shoqërohet me shkallë të lartë të vdekshmërisë.

maliq