Vrasja e Martin Canit/ Babai i tij: Djalit të vogël i themi se vëllai ka shkuar te Ronaldo dhe do të vijë më i madh ose më i vogël

TIRANA-Prindërit e 14-vjeçarit të ndjerë Martin Cani kanë treguar se si ia kanë shpjeguar djalit të tyre të vogël Henrit largimin e të vëllait. Babi i Martin Canit tha për T7+ se Henrit i kanë thënë se Martini është larguar drejt Portugalisë, pranë futbollistit Cristiano Ronaldo. Gjithashtu babai i të ndjerit tha se Henri e kupton largimin e të vëllait edhe nga këngët që dëgjon që i janë dedikuar.

"Henrit pak a shumë i kemi thënë që ka shkuar në Portugali te Ronaldo sepse Martini e kishte idhull kurse Henri kishte Messin. Dhe pak a shumë e kupton kur dëgjon këngët sepse Martinit i kanë kushtuar dy këngë është një shoqe e klasës së vet dhe Luiz Ejlli që e falenderojmë. Dhe i themi që ka shkuar te Ronaldo, do vijë Martini, por do të jetë shumë i rritur ose do të vijë i vogël i themi ne", u shpreh babai.

Martin Cani humbi jetën mesditën e 18 nëntorit 2024 pasi u qëllua me thikë në bark nga bashkëmoshatari i tij, Mario Përlleshaj. Ngjarja e rëndë ka ndodhur pas një konflikti mes dy të miturve që ka degraduar në përdorimin e thikës. Mario Përlleshaj dyshohet se ka qenë në klasë paralele me viktimën, në shkollën 9-vjeçare 'Fan Noli'. Konflikti mes të miturve raportohet se ka nisur në oborrin e shkollës, ndërsa ka agravuar jashtë ambienteve të saj.

Autori ka nxjerrë thikën dhe ka qëlluar mbi 14-vjeçarin, Martin Cani. Pasi është goditur me thikë, Cani është afruar tek shkolla, ka ecur disa metra dhe pasi ka nisur të humbë gjak, është rrëzuar në trotuarin para shkollës. Si pasojë e plagëve të marra, Cani ka ndërruar jetë në spital.

I plagosur nga ky sherr ka mbetur edhe shoku i ngushtë i viktimës, Luis Meçja i cili nuk mësonte në të njëjtën shkollë me to, po stërviteshin në të njëtin klub futbolli. I plagosur mbeti edhe vetë autori, i cili mori dëmtime në dorë dhe u trajtua në spital privat për disa ditë pas ngjarjes së rëndë.

martin cani