Protestat në Tiranë vijojnë me përplasje mes demonstruesve dhe policisë së rendit, shkruan BBC. Nxënësit e shkollave t...
AKTUALITET
Yield-et ngelen të ulëta, bonot 12-mujore e mbyllën prillin pranë normës bazë të interesit
n.fPërditësimi i fundit 1 Maj 2025, 17:26
TIRANË- Yield-et e bonove 12-mujore e mbyllën në nivele të ulëta edhe muajin prill. Sipas të dhënave nga Banka e Shqipërisë, yield-i mesatar i ponderuar në ankandin e kësaj jave ishte 2.78%, me një rritje shumë të lehtë nga niveli prej 2.75% i ankandit të mëparshëm. Rritja e lehtë e yield-it erdhi kryesisht nga rënia e kërkesës. Nga 9.5 miliardë lekë që kishte qenë shuma e shpallur për financim nga Ministria e Financave, vlera totale e kërkesave në ankand rezultoi më pak se 9 miliardë lekë.
Megjithatë, pavarësisht rritjes së lehtë, yield-et e këtyre instrumenteve vazhdojnë të jenë të stacionuara shumë afër normës bazë të interesit. Yield-et po qëndrojnë në nivelet të ulëta edhe në tremujorin e dytë të vitit, çka mund të shpjegohet me likuiditetin e lartë në treg, kërkesën në rritje nga investitorët për të tituj të borxhit të qeverisë dhe primeve gjithnjë e më të ulëta të rrezikut.
Përmirësimi i vlerësimit të kreditit nga agjencitë e specializuara vitin e kaluar duket se ka ndikuar në hyrjen për herë të parë në tregun e titujve të qeverisë në Lekë edhe të investitorëve nga jashtë vendit. Sipas të dhënave nga Banka e Shqipërisë, investitorët jorezidentë financuan 29% të shtesës së huamarrjes së brendshme për vitin 2024.
Kërkesa e investitorëve të huaj është ndër faktorët që ka ndikuar në rritjen e likuiditetit dhe në uljen e yield-eve të titujve qeveritarë në lekë gjatë vitit të kaluar, por edhe në tremujorin e parë të këtij viti, sidomos në tregun e obligacioneve referencë.
Kjo kërkesë ka shtuar likuiditetin dhe ka ndikuar në presione rënëse të yield-eve edhe për instrumentet e tjera të borxhit të brendshëm. Në muajin mars, agjencia e vlerësimit “S&P Global Ratings” përmirësoi për të dytin vit radhazi vlerësimin afatgjatë të borxhit sovran, nga “BB-” në “BB”, me perspektivë të qëndrueshme.
Sipas S&P, investimet e huaja direkte, remitancat dhe rritja e shpejtë e eksporteve të shërbimeve mbështesin perspektivën e qëndrueshme të ekonomisë së Shqipërisë, pavarësisht tensioneve të pranishem gjeopolitike dhe pasigurive të lidhura me mbajtjen e zgjedhjeve të përgjithshme në muajin maj të këtij viti.
Sipas të dhënave të Ministrisë së Financave, në fund të vitit 2024 borxhi publik zbriti në 54.73% të PBB-së, në rënie të mëtejshme nga niveli prej 57.5% i një viti më parë. Që nga viti 2021, borxhi publik ka rënë me pothuajse 20 pikë përqindje ndaj PBB-së. Rënia e këtij raporti i detyrohet sidomos forcimit të lekut në kursin e këmbimit, por pjesërisht edhe uljes së deficitit buxhetor në vitet e fundit dhe rritjes së kënaqshme ekonomike.
Nga ana tjetër, qeveria shqiptare po përdor rregullisht huamarrjen e jashtme, nëpërmjet Eurobondeve, për të mbuluar pjesërisht financimin e deficitit të brendshëm buxhetor. Një pjesë e deficitit të këtij viti do të mbulohet nga huamarrja prej 650 milionë eurosh e Eurobondit që u emetua muajin e kaluar. / Monitor
