Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
AKTUALITET
Zbardhen përplasjet mes kryetares së KLP-së dhe anëtarit: Paguhen dy vetë me rrogë për të njëjtin pozicion
PiranjatPërditësimi i fundit 5 Shkurt 2026, 20:37
Mbledhja plenare e Këshillit të Lartë të Prokurorisë, e caktuar për t’u zhvilluar të enjten më 5 shkurt, nuk filloi sipas rendit të ditës. Anëtari prokuror i Këshillit, Sokol Stojani konstatoi se ende nuk i është dhënë një përgjigje nga kryetarja Mirela Bogdani, se si po veprohet për plotësimin e vendit vakant të sekretarit të Përgjithshëm në këtë institucion. Ai nënvizoi se është e treta mbledhje radhazi që kërkon të informohet, por se nuk i është kthyer asnjë përgjigje.
“Ju nuk mund të merrni kompetencat e sekretarit të Përgjithshëm. Po kërkoj informacion për herë të tretë. Përse nuk zbatohet vendimi gjyqësor i formës së prerë që është në ekzekutim”, tha Stojani.
Ai bëri me dije se ish-sekretarja e Përgjithshme e KLP-së, e larguar nga detyra, ka fituar me vendim të formës së prerë rikthimin në funksion, si dhe pagesën nga momenti i lirimit e në vijim. Po ashtu, Stojani pohoi se sekretari i Përgjithshëm që e kishte zëvendësuar ka një muaj e gjysmë që ishte larguar fetë nga detyra dhe se kishte lajmëruar një muaj para për këtë gjë.
Kryetarja Bogdani e pyeti Stojanin nëse ai dëshiron të rikthejë ish-sekretaren e Përgjithshme të larguar, por ai ju përgjigj se kjo është një situatë e shpërdorimit të detyrës. “Nuk mund të silleni sikur është punë private,” iu drejtua Stojani kryetares së KLP-së.
Diskutimet u kthyen në debate e akuza të ndërsjella mes tyre. Stojani kërkoi transparencë, duke vërejtur se në kushtet kur vendi është vakant, duhet të zbatohet vendimi i gjykatës për kthimin e ish-sekretares së përgjithshme. Sipas tij, përkohësisht duhej të ishte caktuar në atë pozicion si person i autorizuar drejtori i Drejtorisë Juridike pranë KLP-së.
“Jemi juristë e duhet të jemi brenda ligjit. Po kalohet në abuzivizëm. Kështu cënohet besimi tek trupa e prokurorëve dhe publiku”, deklaroi Stojani duke vërejtur se paguhen dy vetë me rrogë për të njëjtin pozicion, situatë që sipas tij është referuar shpeshherë në raportet e Kontrollit të Lartë të Shtetit.
Anëtari Sokol Stojani këmbënguli që kërkesa e tij për transparencë lidhur me këtë çështje të vendosej në rend dite dhe t’i jepej përgjigje me shkrim, ose e regjistruar. Në vijim, ai vërejti se struktura e propozuar duket si një shportë dhuratash. “Nuk joshen njerëzit në kundërshtim me ligjin”, deklaroi ai.
Ndërsa kryetarja Mirela Bogdani I hoqi vërejtje kolegut se përse merrej me këtë çështje. “O Stojan, përse merresh me këto gjëra? Ne kemi një qerre me gjëra për t’u marrë. Nuk ka paligjshmëri”, deklaroi ajo dhe i tha anëtarit Sokol Stojani se ai kishte thënë se takuar ish-sekretaren që ka fituar me vendim gjyqësor rikthimin në punë.
Stojani nuk pranoi ta kishte takuar dhe e akuzoi Bogdanin se e kishte kthyer personale këtë çështje. Ai solli në vëmendje se kishin tentuar ta bllokonin në buxhet shlyerjen e detyrimit financiar ndaj ish-sekretares së larguar. Sipas tij, fatmirësisht kishte qenë iniciativa e anëtarit Erion Fejzulla që e kishte ndalur këtë bllokim.
“Ne me ktë situatë po i themi trupës së prokurorëve dhe publikut: bëj si them unë, por mos bëj si bëj unë”, deklaroi Stojani duke ritheksuar se është shqetësuese se paguhen dy vetë për një pozicion.
Edhe disa prej anëtarëve të tjerë, konstatuan faktin se Stojani e ka ngritur dhe më parë këtë shetësim. Më vonë kjo çështje u fut në rend dite me shumicë votash, ku pro votoi edhe kryetarja Mirela Bogdani. Ajo deklaroi se pas përfundimit të mbledhjes, do të trajtohej dhe me asistencës e një prej funksionareve të administratës që do të sqaronte bazën ligjore të situatës së krijuar. Ndërkohë, anëtari Moisi Duda propozoi të trajtohet në mbledhjen e ardhshme. /Birn/
