Zbulohet parcela me kanabis në Tiranë, arrestohen 2 persona, shpallet në kërkim një tjetër

Foto ilustruese

TIRANË - Një parcelë me kanabis është zbuluar në fshatin Pllanë, në kuadër të operacionit policor të koduar “Plani”. Si pasojë janë vënë në pranga shtetasi V. J., 66 vjeç dhe T. T., 32 vjeç, banues në Zall-Bastar, ndërsa në kërkim është shpallur shtetasi A. K., 41 vjeç, të dyshuar si të implikuar në këtë veprimtari kriminale. Ndërkohë gjatë kontrolleve në banesë është zbuluar dhe një arsenal armësh dhe sasi lëndësh eksplozivi.

Njoftimi i Policisë:

Komisariati i Policisë Nr. 4, në vijim të punës për parandalimin e kultivimit të bimëve narkotike dhe goditjes së armëmbajtjes pa leje, bazuar në masat e përcaktuara në planet operacionale “Territor i pastër” dhe “Sundimi i ligjit”, ka finalizuar operacionin e koduar “Plani”.

Si rezultat i tij u arrestuan në flagrancë shtetasit V. J., 66 vjeç, T. T., 32 vjeç, banues në Zall-Bastar, si dhe punohet për kapjen e shtetasit A. K., 41 vjeç.

Këta shtetas dyshohet se, në bashkëpunim me njëri-tjetrin, kanë kultivuar bimë narkotike në një parcelë në pyllin e fshatit Pllan. Gjatë kontrollit në këtë parcelë, shërbimet e Policisë gjetën dhe sekuestruan në cilësinë e provës materiale, bimë të dyshuara narkotike cannabis.

Në vijim të veprimeve, gjatë kontrollit të banesës së shtetasit V. J., shërbimet e Policisë gjetën dhe sekuestruan 4 armë (1 çifte, 3 armë zjarri karabinë), 4 kallëpë me lëndë të dyshuar eksplozive, 18 krëhëra automatiku, sasi municioni luftarak, 2 kundërgaze, 2 thika, 2 aparate celulare, dhe shuma parash.

Materialet procedurale i kaluan Prokurorisë.

parcele me kanabis tirane policia