Një zjarr në një sipërfaqe pyjore midis fshatrave Andon Poçi dhe Hundëkuq, është konstatuar këtë mbrë...
BOTA
26 vite nga masakra/ Osmani dhe Kurti bëjnë homazhe në Reçak, kryeministri: Gjenocid ndaj popullsisë së Kosovës! Liria jonë të jenë shembull i forcës për të triumfuar mbi padrejtësitë
n.fPërditësimi i fundit 15 Janar 2025, 13:53
Kurti dhe Osmani
KOSOVË- Presidentja e Kosovës, Vjosa Osmani dhe kryeministri i Kosovës, Albin Kurti kanë bërë ditën e sotme homazhe në Kompleksin Memorial në Reçak. Këto homazhe janë zhvilluar në 26-vjetorin e masakrës në Reçak.
Osmani dhe Kurti kanë vënë kurora lulesh pranë lapidarit kryesor në këtë kompleks përkujtimor, aty ku dhe janë të vendosura të gjithë emrat dhe fotografitë e 45 civilëve të vrarë nga forcat serbe. Osmani dhe Kurti morën pjesë dhe në akademinë përkujtimore në komunën e Shtimes për të nderuar viktimat e Reçakut.
Gjatë ceremonisë në përkujtim të masakrës së Reçakut, Kurti u shpreh se ka mbaruar lufta për çlirimin e vendit, por se nuk ka mbaruar beteja për drejtësi. Ai shtoi se masakra e Reçakut ishte gjenocid ndaj popullsisë së Kosovës.
Kurti theksoi se angazhohen që historia e Kosovës dhe liria jonë të jenë shembull i forcës së popullit për të triumfuar mbi padrejtësitë. Ai shtoi se autorët të marrin dënimin e merituar.
“Masakra e Reçakut ishte gjenocid ndaj popullsisë së Kosovës! Bashkë angazhohemi që historia e Kosovës dhe liria jonë të jenë shembull i forcës së popullit për të triumfuar mbi padrejtësitë. I përjetshëm qoftë kujtimi për secilën jetë dhënë për çlirimin e Kosovës dhe lirinë e popullit. Lavdi martirëve dhe dëshmorëve” tha Kurti.
Masakra e Reçakut, e cila ndodhi më 15 janar 1999, tronditën ndërgjegjen e botës dhe nxitën reagimin ndërkombëtar. Masakra që ndodhi në Reçak të Komunës së Shtimës, në qendër të Kosovës, la 45 banorë të fshatit të vrarë dhe masakruar, megjithatë, ende vetëm një person mbetet i shpallur fajtor për pjesëmarrje në këtë masakër, nga gjykatësit e Misionit të Organizatës së Kombeve të Bashkuara në Kosovë -UNMIK.
