Forcat e Ndërhyrjes së Shpejtë janë vendosur përpara Kuvendit, pas tensioneve të raportuara, gjatë protestës e cila po...
BOTA
A do t’i mbulojë shteti ilaçet për humbje peshe? Hyn në fuqi ligji i ri më 1 korrik
PiranjatPërditësimi i fundit 30 Qershor 2026, 11:50
Disa përfitues të programit federal amerikan të sigurimit shëndetësor për të moshuarit dhe personat me aftësi të kufizuara do të kenë mundësi të marrin për herë të parë ilaçe GLP-1 për humbje peshe duke filluar nga 1 korriku, duke paguar një bashkëpagesë prej 50 dollarësh në muaj përmes një programi të ri që synon t’i bëjë këto barna më të përballueshme.
Programi pilot, i quajtur Medicare GLP-1 Bridge, zgjeron qasjen në barnat për humbje peshe të prodhuara nga Eli Lilly dhe Novo Nordisk, përfshirë Zepbound, Foundayo dhe Wegovy.
"Programi federal i sigurimit shëndetësor nuk po e ndryshon ligjin për momentin," tha Juliette Cubanski, zëvendëspresidente dhe drejtoreshë e politikave për këtë program në organizatën kërkimore jofitimprurëse KFF. "Ajo që po bën është të shfrytëzojë një dispozitë të veçantë të ligjit, e cila i jep qeverisë federale mundësinë të krijojë një program të përkohshëm."
Ky program shënon herën e parë që programi federal amerikan i sigurimit shëndetësor do të ndihmojë në mbulimin e kostos së barnave të përshkruara vetëm për obezitetin, në vend që t'i kufizojë ato vetëm për pacientët që marrin GLP-1 për sëmundje si diabeti ose sëmundjet kardiovaskulare. Edhe pse kompanitë farmaceutike kanë ulur kostot që pacientët paguajnë nga xhepi muajt e fundit, shumë prej tyre ende paguajnë rreth 350 dollarë në muaj. Mbulimi përmes programit Bridge do të zgjasë nga 1 korriku 2026 deri më 31 dhjetor 2027. Pas kësaj periudhe 18-mujore, pacientët mund ta humbasin mbulimin për ilaçet GLP-1 të përdorura për humbje peshe, përveç nëse Qendrat për Shërbimet Medicare dhe Medicaid (CMS) vendosin ta zgjasin programin ose Kongresi ndryshon ligjin, sipas Cubanski. Ajo shtoi se ekziston gjithashtu mundësia që prodhuesit e barnave të ulin çmimet e tyre direkte për konsumatorët për t'i përshtatur me bashkëpagesën prej 50 dollarësh.
"Në afat të shkurtër kemi këtë program të përkohshëm, por ende nuk ka një rrugë të qartë se çfarë do të ndodhë pas fundit të vitit 2027," tha ajo. Kush kualifikohet?
Përfituesit e programit federal amerikan të sigurimit shëndetësor që kanë mbulim Part D dhe janë të regjistruar në një plan të pranueshëm mund të përfitojnë nga programi Bridge.
Për t'u kualifikuar, mjeku i pacientit duhet të paraqesë një kërkesë për autorizim paraprak, duke treguar se pacientit po i përshkruhet një ilaç GLP-1 për humbje peshe. Ky autorizim është procesi që lejon farmacinë të lëshojë recetën.
Gjithashtu, mjeku duhet të dëshmojë se pacienti plotëson kriteret klinike që lidhen me indeksin e masës trupore (BMI) dhe gjendjen shëndetësore. Pacienti duhet të ketë një nga kushtet e mëposhtme:
BMI të paktën 35, ose BMI të paktën 30, së bashku me histori të pamjaftueshmërisë së zemrës, hipertension të pakontrolluar ose sëmundje kronike të veshkave, ose BMI të paktën 27, së bashku me prediabet, histori infarkti ose goditjeje në tru, ose sëmundje simptomatike të arterieve periferike.
Pacientët nuk kualifikohen për programin Bridge nëse tashmë marrin një ilaç GLP-1 të mbuluar nga programi federal amerikan i sigurimit shëndetësor për sëmundje të caktuara, si diabeti i tipit 2 ose apnea e gjumit, sipas Cubanski.
Sipas vlerësimeve të KFF, rreth 3.8 milionë përfitues plotësojnë kriteret për mbulim. "Për pacientët që mendojnë se mund të jenë të kualifikuar ose duan të shohin nëse mund të përfitojnë, hapi i parë është të bisedojnë me mjekun e tyre," tha Cubanski.
Cilat barna do të mbulohen?
Programi do të mbulojë:
Foundayo të kompanisë Eli Lilly, një pilulë ditore për humbje peshe; Zepbound KwikPen, një injeksion javor për humbje peshe; Wegovy të kompanisë Novo Nordisk, si në formë injeksioni ashtu edhe pilule.
Sa do të duhet të paguajnë pacientët?
Përfituesit që plotësojnë kriteret do të paguajnë një bashkëpagesë prej 50 dollarësh në muaj për të marrë ilaçet GLP-1.
Megjithatë, ka disa gjëra që duhen pasur parasysh:
Meqenëse programi ofrohet jashtë mbulimit të zakonshëm të Part D, bashkëpagesa prej 50 dollarësh nuk llogaritet në shumën e zbritshme (deductible) ose në kufirin maksimal të shpenzimeve vjetore që pacienti paguan nga xhepi.
Lajmi i mirë është se pacientët nuk kanë nevojë të plotësojnë deductible për të përfituar bashkëpagesën prej 50 dollarësh. Nga ana tjetër, kjo pagesë nuk llogaritet në kufirin maksimal prej 2,100 dollarësh të shpenzimeve vjetore nga xhepi. Përveç kësaj, pacientët nuk do të lejohen të përdorin kuponë ose zbritje shtesë për ta ulur edhe më tej çmimin e barnave./Përktheu Piranjat News
