Një 40-vjeçar ka humbur jetën këtë të shtunë pasi ka rënë në një humnerë në zonën e L&eu...
BOTA
Administrata e Trump-it ul normat e interesit për kreditë studentore, por jo të gjithë studentët kanë të drejtë të përfitojnë
PiranjatPërditësimi i fundit 22 Qershor 2026, 11:27
Departamenti i Arsimit ka njoftuar se po ul përkohësisht normat e interesit për disa huamarrës të kredive studentore federale, një masë që synon të lehtësojë kostot e shlyerjes së kredive në një kohë kur vonesat në pagesa kanë arritur nivelin më të lartë të gjashtë viteve të fundit.
Ulja – një reduktim i përkohshëm prej 1 pikë përqindjeje në koston e huamarrjes – vjen në një moment kur 10.3% e kredive studentore rezultuan me pagesa të vonuara gjatë tremujorit të parë të vitit. Kjo përfaqëson përqindjen më të lartë në gjashtë vjet dhe një rritje njëzetfish krahasuar me mesin e vitit 2024, sipas të dhënave të Bankës Federale të Rezervës së Nju Jorkut.
Nënsekretari i Arsimit, Nicholas Kent, tha se ky ndryshim është një mënyrë për ta bërë “shlyerjen e kredive studentore më të lehtë se kurrë më parë” dhe për të përmirësuar “shëndetin e përgjithshëm të portofolit federal të kredive studentore”.
Portofoli federal i kredive studentore është rritur në pothuajse 1.7 trilion dollarë, ndërsa miliona huamarrës po hasin vështirësi për të mbajtur ritmin e pagesave.
Megjithatë, ky ndryshim nuk zbatohet për të gjithë huamarrësit dhe ata që duan të përfitojnë nga ulja duhet të plotësojnë disa kritere kualifikimi. Në të njëjtën kohë, administrata e Donald Trump po reformon sistemin e kredive studentore duke filluar nga 1 korriku, me kufizime të reja mbi shumat që amerikanët mund të marrin hua dhe mbi opsionet e shlyerjes.
Kush ka të drejtë të përfitojë nga ulja e normës së interesit?
Ndryshimi do të prekë vetëm një pjesë të huamarrësve: ata që kanë kredi federale Direct Loans të lëshuara pas 1 korrikut 2012 dhe që janë të regjistruar në pagesat automatike (autopay) ose regjistrohen tani.
Shumë huamarrës nuk do të përfitojnë menjëherë. Për t’u kualifikuar, ata duhet të ndërmarrin disa hapa, përfshirë regjistrimin në autopay dhe, në disa raste, konsolidimin e kredive të tyre.
Aktualisht, vetëm 40% e huamarrësve përdorin pagesat automatike. Departamenti shpreson që ky përqindje të rritet falë stimulit të ri të uljes së interesit.
Pothuajse 9 milionë huamarrës janë në mospagim (default), që do të thotë se kanë humbur pagesat për të paktën nëntë muaj. Për t’u bërë të pranueshëm për uljen e interesit, ata duhet së pari të rikthehen në status të rregullt, zakonisht duke konsoliduar kreditë e tyre dhe më pas duke aplikuar për një plan të ri shlyerjeje.
Çfarë ndodh nëse tashmë përdorni autopay?
Për huamarrësit që tashmë janë të regjistruar në autopay, kursimi do të jetë më i vogël.
Ata aktualisht përfitojnë një ulje të normës së interesit prej 0.25%, kështu që ulja e re do të shtojë vetëm 0.75% të tjera.
Kur përfundon kjo ulje e normës së interesit?
Për të gjithë huamarrësit që kualifikohen, ulja e normës së interesit është e përkohshme dhe do të zgjasë deri më 30 qershor 2028./Përktheu Piranjat News
