Kryetari i Partisë Demokratike Sali Berisha, ka sjellë në vëmendje një deklaratë të eurodeputetit Tomáš Zdech...
BOTA
Analiza: Si do të shkurtojnë shpenzimet e qeverisë dy sipërmarrësit miliarderë
n.fPërditësimi i fundit 15 Dhjetor 2024, 18:58
Foto ilustruese
SHBA- Ai mund të njihet më mirë nëpër botë si babai i kompanive Tesla dhe SpaceX. Por pas pak muajsh, Elon Musk pritet të merret me shpenzimet e qeverisë amerikane. Korrespondentja e Zërit të Amerikës, Carolyn Presutti shpjegon se çfarë aftësish do të sjellë zoti Musk në Departamentin e Efikasitetit të Qeverisë.
Elon Musk, i njohur si truri pas kompanive SpaceX dhe Tesla, do të përqëndrohet tek shpenzimet e qeverisë në një entitet të ri që do të quhet Departamenti i Efikasitetit të Qeverisë (DOGE), akronimi i të cilit përkon me emrin e një kriptomonedhe.
“Do t’jua heqim qeverinë nga kurrizi dhe xhepat tuaja”, deklaroi Musk.
Agjencia e re DOGE synon të shkurtojë rreth 2 trilionë dollarë shpenzime, pra rreth një të tretën e buxhetit të qeverisë, dhe tre të katërtat e punonjësve të qeverisë.
“E ardhmja do të jetë mahnitëse!”, tha Musk.
Ai nuk ka përvojë qeveritare, ashtu siç ishte edhe rasti me Donald Trump-in kur kandidoi për herë të parë. Por, kompanitë e tij SpaceX dhe Tesla kanë rezultuar efikase, veçanërisht me riorganizimin e linjës së prodhimit të makinave Tesla. Gjatë pandemisë COVID-19, zoti Musk zhvendosi zyrat qendrore të Teslas nga Kalifornia në Teksas, duke fajësuar rregulloret e tepërta dhe kostot e larta.
Ai dhe bashkëkryetari i agjencisë së re DOGE-s, sipërmarrësi miliarder Vivek Ramaswamy, pritet të ndjekin një proces të ngjashëm dhe të eliminojnë shumë rregullore federale. Për të reduktuar kostot, entiteti i ri DOGE do të sugjerojë mbylljen e disa agjencive dhe do të ndërmarrë hapa për të nxitur dorëheqjet masive të punonjësve federalë duke i dhënë fund programeve popullore të punës në distancë dhe duke zhvendosur disa zyra jashtë Uashingtonit.
“Do t’u duhet të mësojnë dhe të kuptojnë se presidenti nuk është mbret – ose të paktën nuk supozohet të jetë në këtë vend – dhe se do të përballen me probleme kushtetuese. Do të përballen me ligjet dhe nevojën për autorizim nga Kongresi”, thotë sindikalisti Steve Lenkart, nga Federata Kombëtare e Punonjësve Federalë.
Për këtë qëllim, Musk dhe Ramaswamy vizituan rishtazi Kongresin. Shumë ligjvënës mbështesin objektivin e deklaruar të entitetit të ri DOGE për të shkurtuar shpenzimet qeveritare, por ka të ngjarë t'i rezistojnë shkurtimeve që ndikojnë tek votuesit e tyre. Të tjerë e dinë se dy sipërmarrësit kanë një komunikim të drejtpërdrejtë me presidentin e zgjedhur.
Musk dhe nëna e tij festuan Ditën e Falënderimeve me Presidentin e zgjedhur Donald Trump në Mar-a-Lago, ndërsa zoti Ramaswamy postoi në Instagram pamje ndërsa lexonte në plazh gjatë Ditës së Falënderimeve se si duhet të zvogëlohet buxheti.
“Nuk di nëse e keni njohur tashmë Elonin, por ai nuk vjen me daltë. Ai vjen me motosharrë. Dhe do ta përdorim atë për burokratët”, tha zoti Ramaswamy.
Entiteti i ri DOGE u krijua si një komision këshillimor i jashtëm që do të rekomandojë shkurtime për administratën e Presidentit Trump dhe Kongresin, që do të ketë autoritetin përfundimtar mbi çdo vendim. Musk dhe zoti Ramaswamy nuk do të marrin rrogë nga qeveria./ VOA
