Një incident ka ndodhur në ditën e 13-të të protestës kombëtare, ku raportohet se një person ka provokuar protestuesit...
BOTA
Autoritete mjedisore greke në alarm, tre arinj gjenden të vrarë brenda pak ditësh/ Ekspertët: Po i afrohen zonave të banuara
PiranjatPërditësimi i fundit 13 Qershor 2026, 14:22
Autoritetet dhe organizatat mjedisore greke janë alarmuar pas ngjarjeve të orëve të fundit në Greqinë e veriut ku 3 arinj janë vrarë brenda pak ditësh dhe flasin për një goditje të rëndë ndaj faunës së egër të mbrojtur.
Rasti më i rëndë u regjistrua në rajonin e Follorinës, ku një ari mashkull, rreth 8 vjeç dhe me peshë 170 kilogram, u gjet i plagosur rëndë pranë autostradës Egnatia. Sipas ekspertëve, kafsha kishte hyrë në një arë me misër në kërkim të ushqimit, ku u qëllua me armë zjarri. Me plagë në qafë dhe shpinë, ariu arriti të lëvizte vetëm disa metra përpara se të ngordhte.
Pak orë më vonë, në një zonë pyjore të së njëjtës prefekturë, u gjet e pajetë edhe një arushë dyvjeçare. Dyshimet e para tregojnë se ajo mund të ketë ngordhur pasi konsumoi ushqim të helmuar, ndërsa përgjigjen përfundimtare pritet ta japin analizat toksikologjike.
Ndërkohë, në zonën Voio të Kozanit, një tjetër ari i ri, rreth 2 vjeç e gjysmë, u gjet i vrarë me tre plumba në kokë. Autoritetet pyjore dhe policia kanë nisur hetimet për identifikimin e autorëve.
Organizatat mjedisore rikujtojnë se ariu i murrmë është specie e mbrojtur në Greqi dhe vrasja e tij përbën vepër penale, ndërsa kërkojnë forcimin e kontrolleve kundër gjuetisë së paligjshme dhe përdorimit të helmeve në natyrë.
Ekspertët theksojnë se vitet e fundit kafshët e egra po afrohen gjithnjë e më shumë pranë zonave të banuara në kërkim të ushqimit duke u bërë shpeshherë edhe rrezik për banorët. Jo vetëm arinjtë, por edhe ujqërit dhe derrat e egër janë parë shpesh në periferi të qyteteve dhe fshatrave të Greqisë veriore.
Raste të tilla janë regjistruar në Kostur , Follorinë, Kozan, Grevena, por edhe pranë Selanikut, ku tufat e derrave të egër janë shfaqur në rrugë dhe zona urbane, duke reflektuar ndryshimet në habitatin natyror dhe mungesën e burimeve ushqimore në pyje.
Por siç theksojnë autoritet dhe organizatat mjedisore vrasja e tyre është barbarizëm dhe vepër penale, ndërsa kërkojnë zgjidhjen e problemit me programe qeveritare të përcaktuara nga ekspertët e fushës.
