"Bashkimi Europian është më keq se Kina"/ Trump përshkallëzon retorikat: Ata do të tërhiqen shumë, do ta shihni! Po na trajtojnë padrejtësisht

SHBA- Donald Trump përshkallëzoi retorikën e tij kundër Bashkimit Evropian të hënën, duke e përshkruar atë si "më të keq se Kina", vetëm disa orë pasi njoftoi një marrëveshje për të ulur tarifat reciproke midis Uashingtonit dhe Pekinit.

"Bashkimi Evropian është në shumë mënyra më i keq se Kina, në rregull? Oh, ata do të tërhiqen shumë. Do ta shihni. Ne i kemi të gjitha dokumentet. Po na trajtojnë shumë padrejtësisht," tha Trump duke sinjalizuar qëllimet e tij për negociatat e ardhshme.

Siç thekson Politico, ndërsa Brukseli ka bërë disa përpjekje për të hequr tarifat e vendosura nga administrata Trump mbi produktet evropiane, deri më tani nuk është arritur ndonjë përparim i konsiderueshëm. Sulmi i fundit i Trump shënon një kthesë të mprehtë nga fjalët e ngrohta që ai kishte përdorur për Presidenten e Komisionit Evropian Ursula von der Leyen javën e kaluar, kur e kishte përshkruar atë si "fantastike" dhe shprehu shpresën për ta takuar së shpejti.

Edhe pse Trump është takuar tashmë me disa udhëheqës evropianë, von der Leyen ende nuk e ka siguruar takimin e saj, duke deklaruar së fundmi se do të pranonte të takohej me presidentin amerikan vetëm nëse do të kishte një paketë tregtare “specifike” për të negociuar.

Javën e kaluar, Brukseli la të kuptohej se mund të ofronte disa lëshime, të tilla si lehtësimi i rregulloreve dhe puna për të frenuar mbiprodhimin kinez, ndërsa paralajmëroi gjithashtu për tarifa mbi mallra amerikane me vlerë 95 miliardë euro nëse bisedimet arrijnë në një bllokim. Këshilltari i tregtisë i Trump, Peter Navarro, e quajti mundësinë e këtyre hakmarrjeve "provokuese".

De-eskalim i përkohshëm me Kinën

Deklaratat e reja agresive të Trump vijnë në një kohë kur Uashingtoni dhe Pekini kanë rënë dakord të ulin tarifat e ndërsjella, pas negociatave në Zvicër, ku morën pjesë Sekretari i Thesarit i SHBA-së, Scott Besant, Përfaqësuesi i Tregtisë i SHBA-së, Jamieson Greer, dhe zyrtarë kinezë.

Sipas marrëveshjes, SHBA-të do të ulin tarifat e fundit të Trump mbi importet kineze nga 145% në 30%, ndërsa Kina do të ulë kundërmasat e veta nga 125% në 10%. Megjithatë, kjo marrëveshje është e përkohshme dhe do të jetë në fuqi për 90 ditë, duke lejuar negociata të mëtejshme.