Bisedimet për paqe mes Rusisë dhe Ukrainës/ Departamenti i Shtetit të SHBA: Nuk do të veprojmë më si ndërmjetës kryesor në negociata

SHBA- Shtetet e Bashkuara nuk do të veprojnë më si ndërmjetësuesi kryesor në negociatat e paqes midis Ukrainës dhe Rusisë, tha sot Departamenti i Shtetit, duke shënuar një ndryshim në rolin e Uashingtonit në konfliktin e vazhdueshëm. Tammy Bruce, një zëdhënëse e Departamentbisedime it të Shtetit të SHBA-së, tha se SHBA-të po ndryshonin metodologjinë me të cilën kontribuojnë në dhe nuk do të udhëtonin më nëpër botë për asnjë arsye për takime. 

"Ne do të vazhdojmë të ndihmojmë, por nuk do të udhëtojmë më nëpër botë si ndërmjetës në takime. Tani varet nga të dyja palët, ka ardhur koha të paraqesin dhe zhvillojnë ide konkrete për t'i dhënë fund këtij konflikti. Është në duart e tyre", tha Bruce për gazetarët.

"Është e qartë se ne nuk do të heqim asnjë nga sanksionet ekzistuese. Presidenti dëshiron që çdo veprim që ndërmarrim si komb të bëhet në mënyrë diplomatike, kjo është e qartë, për shkak të angazhimit të tij. Megjithatë, ai e di gjithashtu se ka pjesë të tjera të botës, të të gjithë planetit, që kanë nevojë për vëmendje", shtoi zëdhënësja e Departamentit të Shtetit të SHBA-së.  

Më parë, zëvendëspresidenti i SHBA-së, J.D. Vance, paralajmëroi se lufta në Ukrainë nuk duket se do të përfundojë së shpejti, duke thënë se tani i takon Kievit dhe Moskës të arrijnë një marrëveshje. Duke folur në Fox News, Vance tha se Presidenti Trump i solli të dyja palët në tryezën e negociatave, por se SHBA-të nuk do të udhëheqin më përpjekjet për të arritur paqen. 

"Nuk do të shkojë askund nuk do të mbarojë së shpejt. Tani varet prej tyre të arrijnë një marrëveshje dhe të ndalojnë këtë konflikt të dhunshëm dhe brutali", tha ai.

Komentet erdhën ndërsa Kremlini shprehu gatishmërinë e tij për bisedime të drejtpërdrejta, por hodhi poshtë një propozim të kohëve të fundit të paqes nga SHBA-ja me arsyetimin se nuk i njihte ndërkombëtarisht territoret e pushtuara nga forcat ruse. Ukraina, nga ana e saj, ka refuzuar vazhdimisht të njohë çdo aneksim rus, duke argumentuar se Vladimir Putin nuk duhet të shpërblehet për pushtimin e territorit të saj sovran.

Njoftimi i Departamentit të Shtetit shënon një ndryshim të rëndësishëm në qasjen e SHBA-së ndaj luftës Rusi-Ukrainë, pas paralajmërimeve se do të tërhiqej nga roli i saj ndërmjetësues nëse nuk do të arrihej përparim.