Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
BOTA
Deportimet masive të emigrantëve ilegalë/ Trump: Disa vrasës e trafikantë droge, njerëzit më të këqij në Tokë! Unë u zgjodha t'i dëboj që këtej dhe gjykatat po më pengojnë
m.lPërditësimi i fundit 4 Maj 2025, 16:56
SHBA- Donald Trump bëri një deklaratë gjatë një interviste të mbajtur të premten, e cila ishte planifikuar të transmetohej në emisionin "Meet the Press with Kristen Welker" të NBC të dielën. Presidenti amerikan pohoi se nuk është i sigurt nëse emigrantët në SHBA kanë të drejtën për një proces të rregullt ligjor të garantuar nga Kushtetuta e SHBA-së.
Administrata Trump po vazhdon me deportimet masive të emigrantëve që janë në vend ilegalisht dhe të jo-qytetarëve të tjerë. Siç theksoi ai, kjo është një përmbushje e premtimit të tij ambicioz zgjedhor për të kryer shpejt deportime masive.
Në qendër të axhendës së Trump është zbatimi i operacionit më të madh të deportimit në historinë e SHBA-së, siç premtoi ai gjatë fushatës zgjedhore të vitit 2024. Në shërbim të këtij qëllimi, administrata e tij ka ushtruar presion mbi gjykatat që të lejojnë largimin e menjëhershëm të emigrantëve që akuzon si anëtarë të bandave nga Venezuela, pa u dhënë atyre mundësinë të argumentojnë çështjen e tyre para një gjyqtari.
Në një intervistë muajin e kaluar në emisionin “Meet the Press”, Sekretari i Shtetit Marco Rubio u përgjigj “Po, sigurisht”, kur u pyet nëse çdo person në Shtetet e Bashkuara ka të drejtë për një proces të rregullt ligjor. Megjithatë, Trump nuk është aq i sigurt.
"Nuk e di. Unë nuk jam avokat. Nuk e di", u përgjigj Trump kur u pyet nga prezantuesja e "Meet the Press", Kristen Welker, nëse ishte dakord me Rubion.
Amendamenti i Pestë i Kushtetutës thotë se “askush nuk duhet të privohet nga jeta, liria ose prona pa një proces të rregullt ligjor”; nuk thotë që personi duhet të jetë shtetas amerikan, dhe Gjykata Supreme ka njohur prej kohësh që jo-shtetasit kanë të drejta të caktuara themelore.
Trump ka thënë gjithashtu se, ndërsa "ne duhet t'i bindemi gjithmonë ligjit", ai do të donte gjithashtu të shihte disa "kriminelë vendas" të dërgoheshin në El Salvador, një propozim i dënuar gjerësisht nga ekspertët ligjorë.
Kur gazetari u përpoq të tregonte se çfarë thotë Amendamenti i Pestë, Trump sugjeroi që një proces i tillë do ta vononte shumë: Nuk e di. Duket se ai mund të thotë diçka të tillë, por nëse po flasim për diçka të tillë, atëherë duhet të kemi një milion ose 2 milion ose 3 milion gjyqe. Kemi mijëra njerëz që janë, disa vrasës dhe disa trafikantë droge dhe disa nga njerëzit më të këqij në Tokë. Unë u zgjodha për t'i dëbuar që këtej dhe gjykatat po më pengojnë ta bëj këtë.
"Por edhe duke pasur parasysh këto shifra për të cilat po flisni, a nuk duhet ta mbroni Kushtetutën e Shteteve të Bashkuara si president?" pyeti gazetari.
"Nuk e di. Duhet të përgjigjem duke thënë përsëri se kam avokatë të shkëlqyer që punojnë për mua dhe ata padyshim do të ndjekin atë që tha Gjykata e Lartë," u përgjigj Trump.
Gjykata Supreme ia ka bërë të qartë administratës Trump në tre vendime të ndara të kohëve të fundit se duhet të lejojë të drejtat themelore të procesit të rregullt ligjor për emigrantët bazuar në një kuptim të hershëm të ligjeve.
Mbi mundësinë e një mandati të tretë presidencial
"Është diçka që, për aq sa di unë, nuk të lejohet ta bësh", tha Trump, i cili herë pas here ka lënë të kuptohet se do të donte të kandidonte për një mandat të tretë.
Amendamenti i 22-të i Kushtetutës thotë pjesërisht: Asnjë person nuk mund të zgjidhet në detyrën e Presidentit më shumë se dy herë.
