"Do t'i kthejmë pengjet tona, do t'i mposhtim armiqtë"/ Kryeministri izraelit deklaron se do të angazhohen në kthimin e pengjeve nga Rripi i Gazës

Benjamin Netanyahu

IZRAEL- Kryeministri izraelit Benjamin Netanyahu përsëriti sot angazhimin e tij për të kthyer në shtëpi të gjithë pengjet e mbajtur në Rripin e Gazës, në një mesazh me rastin e festës hebraike të Pashkës. Deklaratat e Netanyahut erdhën pasi Presidenti i SHBA Donald Trump tregoi dje gjatë një takimi të kabinetit se po bëhej përparim në negociatat për lirimin e pengjeve.

“Po i afrohemi momentit kur do të mund t’i rikthejmë”, tha ai. 

Në një video me rastin e Pashkës hebreje, kur festohet çlirimi i popullit hebre nga egjiptianët, Netanyahu vuri në dukje se në shumë familje do të ketë karrige bosh.

"Së bashku do të kthejmë pengjet tona, së bashku do t'i mposhtim armiqtë tanë, së bashku do të mbështesim të plagosurit tanë dhe së bashku do të përulim kokën në kujtim të të zhdukurve”, theksoi ai.

Mediat izraelite raportuan sot se Egjipti dhe Izraeli kanë shkëmbyer propozime për një marrëveshje armëpushimi në Rripin e Gazës dhe lirimin e pengjeve. Sipas Times of Israel, propozimi egjiptian kërkon kthimin në Izrael të tetë pengjeve të gjalla dhe tetë trupave në këmbim të një armëpushimi 40 deri në 70 ditë, si dhe lirimin e një numri të madh të të burgosurve palestinezë në Izrael.

Siç raportohet nga rrjeti televiziv shtetëror Kan, Netanyahu pati një takim mbrëmë vonë për të vlerësuar situatën me ekipin negociator të Izraelit dhe zyrtarët e sigurisë, në sfondin e planit egjiptian. Zyra e kryeministrit izraelit theksoi gjithashtu se Netanyahu u takua dje me familjet e pengjeve Elkanah Bohbot dhe Rom Braslavsky dhe u tha atyre se Izraeli po punon për kthimin e pengjeve, ndërsa i informoi për gjendjen e negociatave.

benjamin netanyahu