Ndërsa vendet që mbështesin Kievin po shtojnë ndihmat e tyre ushtarake, Moska flet për një afrim të mundshëm me SHBA-n...
BOTA
''Do të ndërpresim tregëtinë me Spanjën''/ Kryeministri Sánchez: Nuk na frikësojnë kërcënimet amerikane, i themi “jo” luftës
PiranjatPërditësimi i fundit 4 Mars 2026, 12:36
Kryeministri i Spanjës, Pedro Sánchez, deklaroi se vendi i tij nuk do t’i nënshtrohet presionit të Shteteve të Bashkuara për të mbështetur luftën e SHBA-së dhe Izraelit kundër Iranit, duke iu përgjigjur kërcënimeve të presidentit amerikan për ndërprerje të marrëdhënieve tregtare me Madridin. Në një fjalim televiziv drejtuar qytetarëve, Sánchez theksoi se Spanja nuk do të ndryshojë qëndrimin e saj nga frika e hakmarrjes.
“Ne nuk do të miratojmë një qëndrim që shkon kundër vlerave dhe parimeve tona nga frika e hakmarrjes nga të tjerët”, u shpreh ai. Deklaratat vijnë pasi presidenti i SHBA-së, Donald Trump, kërcënoi të martën me ndërprerjen e marrëdhënieve tregtare mes dy vendeve. Reagimi i tij pasoi një deklaratë të Madridit, sipas së cilës Spanja nuk do të lejojë përdorimin e bazave të saj ushtarake – të përdorura bashkërisht nga SHBA-ja dhe Spanja, por nën sovranitet spanjoll – për sulme ndaj Iranit. “Ne do të ndërpresim të gjithë tregtinë me Spanjën. Nuk duam të kemi të bëjmë fare me Spanjën”, deklaroi Trump gjatë një takimi në Shtëpinë e Bardhë me kancelarin gjerman Friedrich Merz.
Sánchez argumentoi se pozicioni i Madridit është në përputhje me qëndrimet që Spanja ka mbajtur edhe në kriza të tjera ndërkombëtare, si pushtimi rus i Ukrainës dhe lufta në Gaza. “Ne i themi jo rënies së ligjit ndërkombëtar. Ne i themi jo idesë se bota mund t’i zgjidhë problemet e saj vetëm përmes konfliktit dhe bombardimeve. Ne i themi jo përsëritjes së gabimeve të së kaluarës… Ne i themi jo luftës”, deklaroi ai. Kryeministri spanjoll e krahasoi gjithashtu sulmin amerikan ndaj Iranit me pushtimin e Irakut të udhëhequr nga SHBA-ja në vitin 2003, duke paralajmëruar se një përshkallëzim i ri mund të sjellë pasoja të ngjashme destabilizuese.
Ai theksoi se nuk mund të parashikojë pasojat e mundshme të rënies së regjimit iranian, por shtoi se zhvillime të tilla nuk do të garantonin një rend më të drejtë ndërkombëtar apo përmirësim të kushteve të jetesës. “Ajo që po shohim aktualisht është më shumë pasiguri ekonomike, rritje e çmimit të naftës dhe gazit. Kjo është arsyeja pse në Spanjë jemi kundër kësaj katastrofe, sepse qeveritë ekzistojnë për të përmirësuar jetën e njerëzve, jo për ta përkeqësuar atë”, përfundoi Sánchez.
