Përdoruesit e platformave Facebook, Instagram dhe Messenger kanë raportuar probleme me funksionimin e tyre pasditen e së mërkurës, 22...
BOTA
Dosja Epstein/ Publikohet fotoja e parë së bashku e Epstein, Mandelson dhe ish-princit Andrew, treshja të veshur me robdishanë
PiranjatPërditësimi i fundit 13 Mars 2026, 18:00
Në dokumentet e publikuara nga Departamenti Amerikan i Drejtësisë lidhur me çështjen e Jeffrey Epstein, është zbuluar edhe një fotografi që tregon pedofilin e dënuar së bashku me ish-princin Andrew dhe politikanin britanik Peter Mandelson. Në pamje shihet ish-ambasadori i Mbretërisë së Bashkuar, Mandelson, dhe Andrew të veshur me rroba banjoje të bardha, ndërsa Epstein mban një këmishë të errët dhe pantallona të bardha.
Ata janë ulur rreth një tavoline druri në një verandë, ndërsa përpara kanë filxhanë me flamurin amerikan. Materiali i publikuar nuk jep detaje se kur dhe ku është realizuar fotografia. Megjithatë, televizioni britanik ITV raportoi se ajo është bërë në Martha’s Vineyard, një ishull në Massachusetts që njihet si një destinacion i preferuar pushimesh.
Andrew dhe Mandelson janë marrë në pyetje, në çështje të ndara, nën dyshimin për shkelje të detyrës për shkak të marrëdhënieve të tyre me Epstein. Që të dy janë lënë të lirë ndërkohë që hetimet ndaj tyre vazhdojnë. Andrew ka mohuar vazhdimisht çdo veprim të paligjshëm në lidhje me Epstein, ndërsa Mandelson ka deklaruar se beson se nuk ka vepruar në mënyrë të paligjshme.
Mandelson ka pohuar prej kohësh se kishte besuar versionin e ngjarjeve të dhënë nga Epstein dhe avokati i tij, dhe se të vërtetën e mësoi vetëm pas vetëvrasjes së miliarderit në vitin 2019. Lidhjet e tyre me Epstein çuan gjithashtu në humbjen e posteve që mbanin. Andrew u privua nga titujt mbretërorë, ndërsa Mandelson u shkarkua nga posti i ambasadorit vetëm disa muaj pas emërimit të tij.
Në dokumentacionin e publikuar për Epstein përfshihen edhe fotografi të tjera ku shfaqet Andrew. Në një prej tyre, ai duket teksa gjunjëzohet mbi një grua që ndodhet e shtrirë në tokë.
