Një pedagoge ka shpërthyer kundër kryeministrit Edi Rama, duke e cilësuar si turpin e vendit, dhe duke shtuar se ai duhet të largohet...
BOTA
E pabesueshme/ Stërvitja del jashtë kontrolli në Gjermani, policia dhe ushtria qëllojnë me armë të vërteta
PiranjatPërditësimi i fundit 22 Tetor 2025, 21:31
Një stërvitje ushtarake e ushtrisë gjermane (Bundeswehr) përfundoi në një incident real me armë zjarri, pasi policët e shtetit të Bavarisë qëlluan me armë të vërteta ndaj pjesëtarëve të ushtrisë, duke plagosur një ushtar, në qytetin Erding.
Sipas mediave gjermane, ngjarja ndodhi të mërkurën në mbrëmje, në zonën Hohenlindener Straße në Altenerding, ku dhjetëra forca të policisë, zjarrfikësve dhe ekipe të ndihmës së shpejtë u mobilizuan pas një telefonate emergjente nga banorët.
Si ndodhi incidenti?
Gjithçka nisi gjatë një stërvitjeje të njësive të policisë ushtarake të Bundeswehr-it, e cila zhvillohej në një zonë rurale pranë hambarëve. Banorët, të alarmuar nga prania e personave të armatosur dhe të maskuar, telefonuan numrin e emergjencës 110, duke menduar se po ndodhte një sulm i vërtetë.
Kur policia e landit mbërriti në vendngjarje, ushtarët menduan se pjesëmarrja e tyre ishte pjesë e skenarit stërvitor dhe qëlluan me armë stërvitjeje (jo të rrezikshme). Por policët, të painformuar për ushtrimin, menduan se po sulmoheshin me armë të vërteta dhe u kundërpërgjigjën me zjarr real, duke plagosur një prej ushtarëve.
Një i plagosur, kaos në komunikim
Sipas të dhënave të para, ushtari i plagosur nuk është në rrezik për jetën dhe u transportua me helikopter drejt një spitali të zonës.
Policia lokale deklaroi se situata është ende e paqartë, ndërsa mungesa e koordinimit mes autoriteteve ushtarake dhe policisë civile duket se ka qenë shkaku kryesor i incidentit.
“Mund të konfirmojmë vetëm se operacioni është në zhvillim. Detaje të tjera do të publikohen më vonë,” tha një zëdhënës i policisë për mediat.
Sipas burimeve të BILD, policia federale ishte në dijeni të ushtrimit, por nuk është ende e qartë pse policia lokale në Erding nuk ishte informuar, duke sjellë një alarm të pabazuar që përfundoi në përdorim të armëve të vërteta.
Ngjarja ka hapur debat mbi komunikimin mes forcave të sigurisë në Gjermani, dhe pritet që autoritetet të ndërmarrin hetim të plotë për të përcaktuar përgjegjësitë dhe për të shmangur situata të ngjashme në të ardhmen.
