Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
BOTA
"Epoka e artë e Amerikës fillon tani", Donald Trump betohet si presidenti i 47-të i SHBA, cilat janë pritshmëritë?
M.B.Përditësimi i fundit 21 Janar 2025, 07:51
SHBA- Donald J. Trump u betua si presidenti i 47-të i Shteteve të Bashkuara. Ai është i dyti, që zgjidhet në dy mandate jo të njëpasnjëshme. Donald Trump, ish-zhvillues pronash dhe personalitet televiziv, është rikthyer në Presidencë duke u zotuar të rivendosë pozitën globale të SHBA-së dhe duke premtuar një “epokë të artë” të re për Amerikën.
“Nga ky moment, rënia e Amerikës ka përfunduar”, tha ai pas betimit.
Në fjalimin e tij pas betimit si president, Trump premtoi të shtrëngojë kufirin jugor të SHBA-së dhe të ristrukturojë sistemin e azilit, të kolonizojë Marsin, të ulë çmimet, të lejojë më shumë prodhim energjie dhe të rivendosë pozitën e SHBA-së në skenën globale.
“Amerika do të respektohet dhe do të admirohet përsëri”, tha Trump, duke premtuar se “ne do të jemi të fortë dhe do të fitojmë si kurrë më parë”.
“Ne jemi amerikanë, e ardhmja është e jona dhe epoka jonë e artë sapo ka filluar”, tha Trump.
Ai kthehet në Shtëpinë e Bardhë, pasi i mbijetoi një atentati, pas nxitjes së një grushti shteti të dështuar – dhe si presidenti i parë i dënuar i SHBA. Trump refuzoi të merrte pjesë në betimin e Joe Biden katër vjet më parë, pasi pretendoi në mënyrë të rreme për javë të tëra se ai kishte humbur vetëm si rezultat i mashtrimit të gjerë të votave në zgjedhjet e vitit 2020. Javët midis fitores së tij të fortë në zgjedhje ndaj zëvendësueses së minutës së fundit të Partisë Demokratike, Kamala Harris, kanë qenë të mbushura me spekulime të ethshme mbi atë që Trumpi do të bëjë më pas.
Kërcënime për tarifa tregtare kundër të gjithëve dhe gjithçkaje – jo vetëm BE-së. Është folur egërsisht për aneksimin e Grenlandës, Kanadasë dhe Panamasë, ose të paktën kanalin e Panamasë. Dhe një refuzim i përpjekjeve globale për të ndaluar ndryshimet klimatike. Trump ka premtuar të nënshkruajë një sërë urdhrash ekzekutivë sapo të marrë detyrën. Asgjë e pazakontë rreth kësaj – por është përmbajtja ajo që do të ketë rëndësi./ Monitor
